Long bala khreh ka India ban ïada ïa ka burom ha ka SAFF U17 C’ship

Ka thup kyrteng jong ki player na bynta kane ka SAFF U-17 Championship:
Goalkeepers: Aheibam Suraj Singh, Nandan Roy, Rohit.
Defenders: Brahmacharimayum Sumit Sharma, Chingtham Renin Singh, Jodric Abranches, Karish Soram, Mohammed Kaif, Usham Thoungamba Singh, Yaipharemba Chingakham.
Midfielders: Abdul Salha Sheergojri, Ahongshangbam Samson, Banlamkupar Rynjah, Kh Azlaan Khan, Levis Zangminlun, Mahmad Sami, Manbhakupar Malngiang, Md Arbash, Ngamgouhou Mate, Ningthoukhongjam Rishi Singh, Vishal Yadav.
Forwards: Bharat Lairenjam, Hemneichung Lunkim.

Thimpu (Bhutan), Nailur 19: Ka kynhun India kan sdang ïada ïa ka burom lahduh jong ka ha ka SAFF U17 Championship pyrshah ïa ka Bangladesh ha ka jingïalehkai ba nyngkong na ka Group A ha Changlimithang Stadium kaba ha Thimphu, Bhutan ha kane ka Sngi Thohdieng.
Ka Maldives kadei kawei pat ka kynhun kaba la shah pynïakaplang ha ka Group A, ïa kaba ka kynhun India kan ïakhun ha ka 24 tarik mynta u Nailur. Ki kynhun ha ka Group B ki kynthup ïa ka ri ba ïoh pynlong ïa kane ka lympung mynta u snem – ka Bhutan, nangta ka Nepal, Sri Lanka bad ka Pakistan. Ki ar tylli ki kynhun ba kynsai ba wan kyrdan ba hakhmat duh kin jam sha ka semi-final ba la pynkhreh ban pynïakhun ha ka 28 tarik Nailur, bud sa ka final ha ka 30 tarik Nailur. Ka India ka la long ka lahduh ha u snem 2022, kaba dei ka sien kaba mynshwa ba la pynlong ïa kane ka lympung na ka bynta kiba hap hapoh 17 snem.
Ha u snem ba ladep ïa kane ka lympung la pynlong na bynta ki kyrdan ïalehkai U-16, bad u Ishfaq Ahmed head coach ka kynhun u la pynneh ïa16 ngut ki player napdeng ki 23 ngut kiba la don bynta bad ka ri ban rah ïa ka trophy ha kane kajuh ka madan – Changlimithang Stadium, ba la tei pynitynnad ryngkat ha ka rukom saiñdur tynrai jong ki nong Bhutan bad lah ban kdew ba kadei kawei na ki jaka ba itynnad tam ban ïalehkai phutbol ha ka pyrthei.
Kumba 12 bnai mynshwa, ka India ka la ïakynduh pyrshah ïaka Bangladesh ha ki jingïakhun ba sdang, da kaba jop 1-0 kol ba la thep da u Thoungamba Usham Singh. Ka jingïakhun final ruh ka la long pyrshah ïa ka Bangladesh bad ka India ka la seisoh ban jop da 2-0 kol. Kumta, ka jingangnud ban pynurlong biang ïa ka final kumba jia ha u snem 2023 ka kular ïam ka jingïakhun kaba itynnat, ha kaba ka India ka thmu ban dang ïai bat hi dalade ïa ka bor halor kine ki ri para marjan jong ka thaiñ mihngi.
“Ngi khmihlynti ïa ka jingïakhun kaba jwat pyrshah ïa ka Bangladesh. Ngi sngewkmen ban ïakhun pyrshah ïa ki. Nga kwah ïa ki player jong Ngi ba kin shah tynjuh bad Ngi tip ba ka Bangladesh kam dei satia ka kynhun kaba suk ban ïakhun. Hynrei Ngi sngew skhem ban sdang ïa ka lynti ïaid kaba seisoh. Ngin kyrmen ba baroh kin sakhi ïa ka phutbol kaba iynnad lashai ka sngi,” ong u Ishfaq Ahmed.
U rangïalehkai pdeng madan (Midfield) – u Ngamgouhou Mate, u ba la mih madan baroh saw tylli ki jingïalehkai ha u snem ba ladep bad long kapten ïa ka India ha ka jingïakhun paralok pyrshah ïa ka Indonesia ha u bnai ba ladep, u khlem don kano kano ka jingban khia kum ki lahduh ban ïada ïa ka burom. “Ngi la wanphai biang hangne hadien shi snem. Lashai, pyrshah ïa ka Bangladesh, Ngi kwah ban ïakhun shitom naduh ba sdang. Ngi kyrmen ïa ka resol kaba bha,” ong u ne u rangïalehkai ba 16-snem.
“Watla katto katne ki player jong Ngi ki dang long kiba thymmai ha ki lympung lehkai ri naduh ba Ngi la pynrung thymmai katto katne ngut ha ka kynhun, hynrei hadien ka SAFF ha u snem ba ladep, ka jingïalehkai paralok pyrshah ïa ka Indonesia ryngkat ka por ba Ngi la ïoh kilanmet lang, Nga ong ïa kane da kaba thikna..ba Ngi la san bha. Ki long kiba shemphang bha haba nujor ïa ka por ba ladep,” ong u Ahmed.
“Hadien kane, Ngi don ki jingïalehkai kiba kongsan ha ka Asian qualifier ki ban sa wan bad Ngi kwah ban seisoh ha baroh ar tylli ki lympung. Ngi la pynkhreh kumba donkam. Ka SAFF ka wan nyngkong, te ha kane ka khyllipmat Ngin pynleit jingmut shuwa ïa kane,” u la bynrap.
Mynta u snem ki don arngut ki rangïalehkai ka Jylla Meghalaya kiba la shah jied ban mihkhmat ïa ka kynhun ha kane ka lympung, kine ki kynthup ïa u Banlamkupar Rynjah bad u Manbhakupar Malngiang kiba ïalehkai pdeng madan lane kum ki midfield.