Liem ka Rangdajied ha ka Laitkor, haduh 5-0 kol jop ka Langsning ïa ka Sawmer ha ka SPL
Mynta ka sngi ka Nangkiew Irat SC pyrshah ïa ka Nongthymmai SC por 3:00 PM
Shillong, Rymphang 18 : Ka kynhun ïalehkai jong ka Laitkor SC ka la ïoh ban pynliem noh ïa ka kynhun kaba ïakhun ban ïa knieh ïa ka nam lahduh ha ka Shillong Premier League, kata ka Rangdajied United FC da 2-0 kol ha ka jingïakhun kaba long ha madan SSA Stadium, First Ground, Polo.
Ha kawei pat ka jingïakhun, ka Langsning FC ka la pynliem noh ïa ka Sawmer SC da 5-0 kol kynthup ïa ka hat-trick na u Dauruhipaia Pale.
Ka jingïalehkai ha kane ka sngi kam shym la ktah satia ïa ka kyrdan jong ki kynhun ha ka miej khein point hynrei ka Rangdajied kaba don ha kakyrdan kaba lai bad ha ka la lynti ban khur ïa ka nam lahduh ka hap ban ïakhun tyngeh pyrshah ïa ki kynhun kiba don shakhmat duh ar tylli, kata ka Mawlai SC bad kumjuh ïa ka Shillong FC da ka jingkyrmen ban khur ïa ka jingjop. Ha kawei pat ka jingïakhun, ka Sawmer ka dang don hapdeng u lain jingma watla mynta ki don ha ka kyrdan kaba hynñiew namar ki lai tylli ki kynhun kiba don kham sha trai ki dang sah sa katto katne tylli ki jingïakhun.
Ka Langsning bad ka Laitkor ha kawei ka liang ki la kham ïa jngai ka jingïoh kamai point na kiwei ki kynhun bad kumta ki don mynta ha ka jingshngaiñ.
Haba phai sha ka jingïakhun, u Risuk Malngiang u la ïoh ban thep ia ka kol kaba nyngkong jong u ha ka minit kaba 21 lyngba ka penalty ha shwa ba u Samborwell Mynsong un pynbud ïa ka kol kaba ar ha ka minit kaba 23 na bynta ka Laitkor katba ka Rangdajied watla ka pyrshang borbah kam shym la lah satia ban pynphai tad haduh ban da kut ka por ïalehkai.
Ha kawei ka jingïakhun pat, watla ym shym la don satia ba thep kol ha ka kylla step hynrei ka jingïakhun ha ka kylla miet ka la wan kynsan kynsan ka jingkylla hadien baka Sawmer ka la shah thep haduh saw kol tang hapoh ki 16minit kynthup ïa ki lai kol na u Dauruhipaia kata ha ka minit kaba 48, 51 bad ha ka minit kaba 61.
Katba ïa kawei pat ka kol la ïoh banthep da u Daohipaia Rymbai ha ka minit kaba 49 bad ka kol kaba san pat la ïoh ban thep da u Lamgougin Khongsai ha ka minit kaba 90.