Leit wad jaka ki heh Tourism ban shna jaka hiar Helicopter ha Sohra

Sohra, Naitung, 06: Da ka jingthmu ban kyntiew shuh shuh ïa ka kam jngohkai pyrthei ha ka jylla khamtam ha Sohra, kaba la long lypa ka jaka jngohkai ba pawnam tam ha ka jylla, ka tnad Tourism mynta ka la sdang ban wad jaka ban shna ïa ka Helicopter ha Sohra.
Lah ban kdew ba dang shen ka sorkar jylla ka la rai ban shna ïa ka jaka hiar helicopter ha Sohra bad ha ki katto katne ki jaka na ka bynta ban pynbha shuh shuh ïa ka jingwan ki nongjngohkai pyrthei bad khamtam eh ban pynsuk ïa ka leit ka wan jong ki.
Halorkane, la ïoh jingtip ba ki ophisar jong ka tnad Tourism dang shen ki la leit ban peit ïa jaka ha Shnong Mawmluh na ka bynta ban shna ïa kane ka jaka hiar bad sangeh Helicopter.
Ka Mawmluh kadei kawei na ki Shnong ha Sohra bad ka jngai kumba 60 KM ei ei na Shillong. Kadei ka shnong kaba la don lypa ki jaka jngohkai kai bad kumjuh ruh kiwei kiwei pat ki jingdonkam jong ki nongjngoh pyrthei.
Nalor ba ka jan ïa ka Krem Dam um, kaba la pawnam namar ka Meghalayan Age, kadei ruh ka lnynti ban leit sha Nongriat ha kaba ka don ka jingkieng jri ba armala. Nangta kadei ka lynti banleut sha Cherrapunjee Holiday Resort ha Laitkyndew, ka Smoky Falls Mae Fi Resort ha Tyrna bad kiwei kiwei de ki jingdonkam ki nongjngoh pyrthei.
Dang shen ha kane ka Shnong la plie ïa ka 100 Water Falls Camp, ka Highland Camp bad mynta ka jingshna ïa ka Restaurant ba 1 klur tyngka da ka tnad Soil and Water Conservation ka dang ïaid shaid shaid.
Na kane ka jaka ba mut ban shna ïa ka jaka hiar helicopter, lah ban ïohi kyndiang ruh ïa ka kshaid Laipateng Khohsiew, ka Kshaid Daiñthlen, Kshaid Nohkalikai malu mala, ka Shnong Nongriat bad ki bynta ba long ranab bad ki jaka riat jong ka thaiñ Riwar Sohra bad Shella.
U Myntri Rangbah ka jylla, u Conrad Sangma, u ba bat ruh ïa ka tnad pla tyngka, ha ka Budget Speech mynta ka snem, u la kdew kyrpang ïa ka Sohra na ka bynta ban kyntiew ïa ka kam jngohkai pyrthei, ha kaba u la ong ba ka sorkar kan pynlut kyrpang na ka bynta ban tei ïa ki jingdonkam ha kaba ïadei bad ka kam jngohkai pyrthei ha Sohra.
U Conrad u la ong ruh ha kane ka Budget Speech ba u la pynkiew arshah ïa ka jingmang pisa na ka bynta ka kam jngoh pyrthei bad kane ka jingmang ka long 173 Klur tyngka.