Leit ujor ka HYC sha ka NCST ïa u Guru bad Youtuber ba kynnoh bam doh briew ka shnong ha jylla
Shillong, Naitung 19: Ka la don ka jingleit ujor sha ka National Commission for Scheduled Tribes pyrshah ïa u Sushil Guru bad u nongshna ïa ka YouTube channel u Raghav Sharma ba ki la pynmih ïa ki jingkren kiba aiding, kiba wanrah ka jingïapher jaitbynriew bad ki kyntien kiba ktah ïa ki shnong riewlum ha ka jylla Meghalaya.
U Samla Enlang Sawian, uba dei u nongsaid aiñ bad u Education Secretary ka seng Hynñiewtrep Youths Council (HYC), u la aiti ka jingthoh jingujor sha ka commission kaba kyrpad ïa ka jingtuklar kaba mardor bad ban shim kam da ka aiñ pyrshah ïa ka jingsaphriang khubor kaba ktah ïa ki riewlum bad kumjuh ruh kaba pynjah burom ha ki rynsan digital.
Ha kane ka jingujor la kynnoh ba ha ka 13 tarik u bnai Jylliew kawei ka video kaba la upload hapoh ka Youtube Channel jong u Sharma ka, @Supertalks, kaba pyni ïa u Sushil Guru, uba la kam ba u dei u Guru, u la kren ki kynthoh kiba ktah mationg shaphang ki riewlum kiba sah ha Meghalaya, kaba kynthup ruh ka jingpynthikna ba ki ju leh ïa ka lehniam ba kñia da ki briew bad ki bam pat ïa ka doh briew.
U Bah Sawian u la ïathuh ba kane ka video la pynsaphriang lyngba ka online news bad ha ki social media channel, ba pynphriang ïa ki kyntien ïa isih ha kane ka rynsan. U la banjur ba ki jingkren ki dei tang ba ki long ki bym shisha hynrei ki la pynwandur ban pynrem bad kynthoh ïa ki trai ri trai muluk kiba dei ki riewlum Scheduled Tribe jong ka Meghalaya.
Kane ka jingujor ka kdew ruh halor ki kyndon hapoh ka criminal, constitutional, bad ka human rights jurisprudence.
U Bah Sawian u la kyntu ïa ka commission ba kan shim suo motu cognisance halor kane ka kam, ban pynlong ka jingtohkit ïa kitei ki riew shimet bad ïa ka rynsan media kiba kynthup bad kiba pynmih jingbthah ban pyrkhing ïa kine ki jingpynmih ki video kiba wanrah ki jingïapher jaitbynriew kiba ktah ïa ki Scheduled Tribe, kumta dei ban khot hajir ïa kine ki briew bad ban pynshitom hapoh ka BNS bad SC/ST (Prevention of Atrocities) Act, bad ba ki dei ban pynmih ïa ki jingpanmab paidbah halor kine ki jingkren ba kynthoh ïa ki trai ri trai muluk jong kane ka jylla, naba kine ki dei ki kam kiba wanrah ruh ki jingisih jait bynriew bad ka suk ka saiñ hapdeng ki jaitbynriew ha ka ri baroh kawei.