Leit tynruh biang u CM bad Dy CM ïa u Amit Shah ban pyntreikam noh ïa ka ILP ha Meghalaya

Shillong, Nohprah 18 : U Myntri Rangbah ka Jylla u Conrad K Sangma ryngkat lang bad u Symbud Myntri Rangbah ba khmih ïa ka tnad kam pohïing ka jylla u Bah Prestone Tynsong, ki la iakynduh ïa u Myntri kam Pohïing ka Ri u Amit Shah ha Delhi mynta ka taiew, bad kyrpad ïa u ban mynjur noh ban pyntreikam ïa ka Inner Line Permit (ILP) ha Meghalaya.
Kine ki Nongïalam na Jylla, kila pynpaw hakhmat u Amit Shah ba ka jingpyntreikam ïa ka ILP ka dei ka jingangnud kaba la slem jong u paidbah bad kala ïaid hynriew snem ka jingap ïa ka Sorkar Pdeng naduh ba ka Jylla, ka la mynjur da ka resolution hapoh ka ïing Dorbar Thaw Aiñ ban pyntreikam ïa ka ILP.
“Ngi la ïakynduh ia u Amit Shah ha ka 14 tarik Nohprah ha Delhi bad ngi la ïakren sani bha halor ka jingdawa pyntreikam ïa ka ILP” ong u Bah Prestone Tynsong haba ïakren bad u nongai khubor.
U pyntip ba ha kane ka jingïakynduh la ïakren ruh halor ka jingai jingmynjur ban pynrung ïa ka ktien Khasi bad Garo ha ka khyrnit ba phra ka Riti Synshar jong ka Ri, ban ai noh ïa la ka jong ka Civil Service Cadre ïa ka Meghalaya bad ka Foreigners & Immigration Act, 2025.
U Bah Prestone ula ong ba ka Foreigners & Immigration Act ka dei kaba kongsan bha ha Jylla khamtam haba sakhi ïa ki jinglong jingman ha ri Bangladesh. “Ka jingïadei hapdeng ka ri India bad ka Bangladesh kam long kaba itynnad bad ngi hap ban shimkhia bha ïa ki lad jingïada khnang ban lah khang ïa ka jingwan rung tuh ki mynder ri, la ki dei kiba wan lyngba ka Assam ne na kylleng sawdong ki khappud” ula ong.
Halor ka ILP, u Bah Prestone u pyntip ba u Amit Shah ula ïathuh ba ka Ministry of Home Affairs (MHA) ka dang khmih bniah ïa kane ka kam bad kumjuh ruh ïa ka jingpynrung ïa ka ktien Khasi bad Garo ha ka khyrnit kaba phra.
“U Amit Shah ula pyntip ba ka MHA ka dang khmih bniah ïa ka jingdawa ILP bad pynpaw ba ha ka por kaba biang, ngin sa pyntip sha phi ïa ka jinglah pyntreikam ïa ka” ïathuh u Bah Prestone haba pyntip ba ka Sorkar ka khlem shongthait ban buddien ïa ka jingdawa ILP bad ka Ktien Khasi bad Garo naduh ba ka ïing Dorbar Thaw Aiñ kala ai jingmynjur da ka resolution.
“Ngi don jingkyrmen ba ha kawei ka sngi, ka Sorkar Pdeng ban sa pynmih ïa ka ‘Draft’ ka ban pynthikna ba ki nongshong shnong ka Meghalaya kin long kiba shngaiñ bad yn ym don mano mano ruh ki ban ïoh rung ne sah hapoh ka Jylla khlem da shah khmih bniah shuwa” ula bynrap.
Haba kylli ïa ka jingbym kren shai ka Sorkar Pdeng la kan ai ne ym ai ïa ka ILP, u Bah Prestone ula ong “Kaba ngi hi, ngi ïakren ka long tang katne, sngewbha burom lem ïa ka jingangnud jong ki paidbah ka Meghalaya”.
U Bah Prestone ula pynpaw ïa ka jingsngewtynnad ba tang hadien ba la dep ïakynduh ka Sorkar Jylla ïa u Amit shah, u MP ka Lok Sabha na Shillong Dr Ricky Syngkon ruh ula leit ïakynduh ïa Amit Shah ban dawa ILP.