Nongstoiñ, Ïaiong 3: Ka HYC Lai Lyngdoh Circle hapoh ka jingïalam samla Wandapynkmen Marweiñ President bad Willbirthson Kharsyiemlieh General Secretary bad samla Lumlang Kharsyiemlieh President HYC West Khasi Hills District, ha ka janmiet sngi u Blei ka la ïoh ban leit sngew lem bad kner jingïarap ïa ka ïing ka kong Bilistilda Dkhar na ka Shnong Mawthung-kper, namar ka ïing jong ka, ka la shah bam duh ha ka ding kaba la jia ha ka janmiet sngi saitjaiñ ha ka por 4:40 janmiet.
Ha katei ka jingpluh ding, ki jingdon jingem ki la ingkhong khait bad ka jinglut ka la kot da ki lak tyngka. Donbok pat ba ha ka por ba jia ka jingpluh ding, ym shym la don mano mano ha ïing ba ki khun ki dang leit skul, ki kmie kpa ki dang leit trei, kumta kam don ka jingjia ba sngewsih ïa ki mynsiem briew. La ong ruh ba ka jingpluh ding ka lah ban dei na ka jingthut ka bording.
Ka seng ha kane ka jingleit ïarap la pynlong ka jinglang lyngkot bad la ïoh ruh ïa ka jingkren na u samla Lumlang, u ba la ai jingkren pyntngen ïa ka longïing, namar dang lait jingsngewsih ïa ki mynsiem briew. U la ong ba ka seng kam lah ban shu sngap haba wan ki jingeh ki para doh para snam, kumta ka seng ka ïarap lem kat I bor barit bad ka kitbok ïa ka Ïing ba u Blei un ïarap ban pynïoh ka lad ïa kiba la duh noh.
U Sordar ka Shnong Mawthungkper Bah Kitbok Nongdkhar u la ai khublei ïa ka jinglakloi ka seng ban ïarap lem. Katba u samla Willbirthsoon Kharsyiem-lieh General Secretary u la ong ka seng ka la ïa pyrkhat ban ïarap lem la i bor barit bad u la ai khublei kitbok ïa ka ïing ka sem kin kiew biang shaphrang.
U la kyntu ïa ki Nongmihkhmat, ki para doh para snam bad bor sorkar ban ïarap bad pynkloi ki lad jingïarap.
