Shillong, Naiwieng 16: Ka jylla Meghalaya ka la pyni paidbah ïa la ki jong ki jingriewspah ha ka kolshor bad ki jinglah ban pynmih ïa kiba bun ki tiar kiba pher bapher ha ka India International Trade Fair (IITF) 2025. Kane ka jingpyninam kaba dei kumba 14 sngi, ka dei kaba la pynlong da ka International Trade Promotion Organisation (ITPO), ka dei kaba la pynlong ruh naduh ka 14 tarik haduh ka 27 tarik, 2025, ha Pragati Maidan, Bharat Mandapam, New Delhi.
Ka Meghalaya Pavillion kaba dei ka jaka pyni ïa ki tiar na jylla kiba don hapoh ka IITF, la wan ban plie da u Thomas Sangma, Lamphang ka Ïing Dorbar Thaw aiñ ka jylla ha ka jingïadonlang ki 42 ngut kiba sengkam lajong na Meghalaya kiba la shim bynta ha ka fair. Kine ki kynthup ïa 24 ngut kiba sengkam lajong napoh ka PRIME start-up ecosystem bad 18 ngut na Directorate of Food Processing.
Kitei kiba sengkam kiba la shim bynta ki dei ha ki lai kynhun ki la ïoh ban pyni ïa ki tiar ha ki 12 tylli ki dukan bapher bapher.
Kiba leit jngoh ïa kine ki jingpyninam ki la shem ïa kiba bun ki tiar kiba la shna na Meghalaya. Ba la buh bun jait da ka PRIME start-ups kynthup ïa ki tiar thaiñ jaiñ, ki tiar shna kti, kiba ohshrong na ki dieng, ki khiew, ki jingshna jingbam, ki musli musla bad kiwei kiwei. Ki tiar napoh ka Directorate of Food Processing ki kynthup ïa ki tiar kum ka umsoh, ka jam, candy, chip, ashar, ki slasha bad kiwei pat ki tiar.
Ha kane ka jingpyninam la pyni ruh ïa ki kam ba la leh da ka tnat Jngohkai kum ki jaka jngohkai ha ka jylla kum ki kshaid, ki jaka kiba jyrngam, ki krem kiba jrong, ki wah kiba khuid bad ki jingkieng diengjri kiba don ha kylleng jong ka Khasi, Jaiñtia, bad Garo Hills, ha ryngkat ruh bad ki kolshor ki riewlum bad ki tamasa.
Ka Meghalayan Age Ltd, kaba la buh ia ki dukan ka la pyni ia ki tiar ba la shna da ki dieng, ki seij, bad textiles, nalor kiwei kiwei. Ka jingïashim bynta ka dei ka jingpyrshang ka jingïatreilang hapdeng ka Planning Department, DoFP, PRIME, bad Tourism Department.
Ka la don ka jingwan jong ki briew sha kine ki jaka pyni nam ba la buh da ka Meghalaya.
Na ka bynta kiba sengkam la jong na Meghalaya, ka jingïashim bynta ha ka IITF ka la long ka lad ka lynti ban kyntiew ïa ka ïew ka hat. Kane ka ai ruh ka lad ban ïoh jingithuh ïa ki tiar, ban pynshongdor ïa ki, ki jingtip ha ka jingïakob, kan pynkhlaiñ ïa ka jingshaniah ha ka sengkam lajong bad kiwei kiwei ki kam ki ban wanrah ka jingkiew kaba neh slem.
