Nongstoiñ, Lber 29: Ki samla jong ka thaiñ West Khasi Hills District kiba kynthup na ka Seng Hynñiewtrep Youths Council Ri-Muliang pyllun ryngkat ka seng Federation of Khasi Jaiñtia and Garo People na ka thaiñ Langpih, ha ka sngi ba ar ki la leit ban buh ha phyllaw DC ophis Nongstoiñ ïa u mawpud ba la shu wan thung beaiñ da ka Assam ha kine ki khyndiat sngi ba la lah ha Kamphaduli.
Ki nongïalam jong ki ar seng ki la ong ba shibun ki Mawpud kiba la wan ban thung da ka sorkar Assam kiba kynthup ïa kiba la thung ha ka shnong Kamphaduli, Umbyrsit bad kiwei kiwei, la leit ban jynrat da kitei ki samla kum kawei na ki jingïaleh ha kaba paw bad ha kaba shai khlem da riej.
Ki nongïalam jong ki ar seng, ki la pynrem jur ïa kane ka jingwan thung mawpud jong ka Assam ha ki bynta jong ka Meghalaya. Ki la ong ba kane ka jingleh ka dei ka jingleh khlem kheiñ kor ïa kaei ba la ïa kren hapdeng ki CM jong ka Meghalaya bad Assam ha ka 16 Naiwieng 2021 ha Langpih.
“Ngim sngew phylla ba ka Assam na ka por sha ka por ka ju leh tam bad kam ju burom ïa ki jingïakren, kumta na ka liang jong ngi, ngin nym shongthait bad lada ka Assam ka leh kumne, ngi long kiba la khreh ban weng ïa ki Mawpud ba wan buh ka Assam. Ngi kyntu ïa ki bor jong ka District ban nym ai lad ban ka Assam kan wan leh kumne. Lada leh ïa kano kano dei ban don ka jingïatip lem hapdeng ki bor jong ka Meghalaya bad Assam”, ong ki nongïalam jong ki ar seng.
Na ka liang jong u DC P.D.Sangma u la ong ba na ka liang ka District Ddministration kam don jingtip ei ei halor kane ka jingwan thung mawpud ha Khampaduli bad Umbyrsit. U la ong ka lah don ka jingïakren bad u DC Kamrup ba na ka liang jong ka Assam kan pynlong ïa ka Survey, tangba ym ha kum kane ban thung ïa u mawpud ha ki jaka jong ka Meghalaya. U la ong ba un sa ïa kren bad u DC kamrup halor kane ka bynta, khnang kan nym wan ka jinglyngngoh ïa ki paidbah jong ka thaiñ khamtam kiba sah ha khappud.
