Leit phai ïing u rangbah ba shah siat ha Mukroh da ka jingrit mynsiem

Shillong, Nohprah 09: Hadien 17 sngi ba u la shah sumar ha NEIGRIHMS namar ka jingshah siat ha ki Pulit Assam ha Mukroh, u Bah Cheini Nartiang, mynta ka sngi, u la mih noh na kane ka Hospital na ka jingsumar ïa ka khmut jong u ha kaba u kuli u la ksam ha ka por ba shah siat ha ka 22 tarik u bnai baladep.
Haba pynpaw ïa ka jingkmen ba un ïoh mih na ka jaka sumar, hynrei u la pynpaw pat ka jingsngewtieng ba un dang leit rep biang sha kajuh ka jaka ba u ju rep, namar ka jingwan pyndik bad ka jingwan thombor ki Assam na ka por sha ka por.
U Bah Cheini, u dei u nongrep bad u don 6 ngut ki khun bad baroh kidei ki kynthei. I ba nyngkong i la don 28 snem bad iba khatduh idon 5 snem.
“Ngam tip shuh mano ban peit ïa ka rep ka riang jong nga mynta, namar ki khun kidei ki kynthei suda bad nga ruh ngam pat lah ban leit rep mynta”, u la ong.
Une u rangbah uba la mih ha ka 22 tarik ban leit sha lyngkha, hynrei u la ngat ha u kuli jong ki Pulit Assam ha katei ka sngi ba sngewsih na ka bynta ka ïing ka sem jong u, kaba long ka ïing kaba duk kaba u shu sah ruh ha ka ïing kaba shu lape da ka dew byrtha.
U Bah Sarlangki Dkhar, uba dei shibahaïing bad u Bah Chaini, u la wan shaw lang ryngkat bad i kurim jong u Bah Cheini, u la ïathuh kane ka ïing ka mad bun ki jingeh naduh ba u kpa u la leit shah sumar ha Hospital, namar ba ym don nongkamai shuh ha ïing hasem. Mynta ba wan shaw ïa u ruh hap pyllut pisa ka bai kali. Une u rangbah, u la ïathuh ba u Bah Chaini u la ïoh ïa ka jingïarap na ka sorkar 50 hajar tyngka ha kaba u la pyni ruh ïa ka Cheque kaba la ai na ka bynta jong une u kpa jong ki 6 ngut ki khun.
U Bah Sarlangki, u la beiñ ruh ïa u MLA jong ka Mowkaïaw, u Bah Nujorki Sungoh, uba la iehbeiñ ïa ki paidbah jong ka Mukroh, hynrei uba shu wan jngoh tang hadien ba la jia ka jingshah siat ki paidbah bad u wan ruh tang haba khot ki paidbah ba don ki jingialang ne ki kam.
U la pynpaw ruh ka jingsngewkhia ba ki paidbah ka Mukroh kin dang ïai mad jingeh bad jingshah thombor, namar ba kane ka Shnong kam shah kynthup lang ha ka jingïapynbeit pud. “Hooid ka sorkar ka ong ba kane ka Shnong ka hap ha Meghalaya, hynrei balei pat ki paidbah ki dang shah thombor ha ka Assam, haba kam dei ka jaka ba ïaknieh ne ka jaka ba hap ha Meghalaya?”, u la ong.
U la pynpaw ruh ba ki paidbah kin nym pat shangaiñ wat lada la don ki Pulit, namar ki don tang khyndiat eh haba ïanujor bad ka jingbun ki Pulit Assam. “Kaba bha hi ka long ban ai suloi ïa ki paidbah ka Mukroh ban ïada hi dalade ïalade”, u la ong.
Haba ai khublei ïa kito baroh kiba la wan jngoh bad ïarap ïa u Bah Chaini bad kiwei pat kiba mynsaw, u Bah Sarlangki, u la ong ba ka jingpynduna noh ïa ki Pulit SF-10 kiba la ïoh jinghikai pyntbit bha, ka la long ka jingduhnong kaba khraw.