Shillong, Nailur 11 : Ka Principal jongka Government Girls’ Higher Secondary School, Jowai ka la panmap na u Director halor ka jingtem jong ki khynnah skul ïa ka jingrwai jong ka seng saiñ pyrthei VPP kaba dei shaphang u Prah.
“ Ka Principal ka la ïakynduh ïa u Director jongka School Education bad pan map na u la ïathuh ïa nga bad ïa ka jingpan map jongka ruh yn sa bishar bniah da ka tnad pule puthi” ïathuh u Myntri ka tnad pule puthi u Rakkam Sangma haba ïakren bad ki lad pathai khubor.
Kat kum ka shithi ba la phah da u Director (DSEL) u Swapnil Tembe sha ka Principal katei ka skul ha ka 8 tarik mynta u bnai la pynpaw “ba ka tnad ka la ïoh jingtip ba ha ka sngi ba rakhe ïa ka Sngi Burom ïa ki Nonghikai la pynlong ïa ka prokram bad la shah ruh ïa ki khynnah skul ban tem bad shad ïa ka jingrwai jongka seng sain pyrthei kaba long pyrshah ïa ki kyndon aiñ ka sorkar”.
Dei halor kane la pan jingpynshai na katei ka Principal halor kane ka jingleh bym suidñiew ia ki kyndon aiñ jongka sorkar.
