Shillong, Naiwieng 11: Ha kaba ïadei bad ka jingïakhih jong ki samla pule jong ka NEHU mynta sa na ka liang ki nongtrei Non-Teaching Staff kiba don ha ka shatri jong ka North Eastern Hill University Non-Teaching Staff Association (NEHUNSA) ki la pyntip ba ki la ai ka jingkyrshan ba pura ïa ka jingïakhih shah thngan jong ki samla pule (NEHUSU) halor ka jingdawa ban hiar shuki mardor u Vice Chancellor Prof PS Shukla.
Katkum ka kyrwoh khubor na ka liang ka seng ka la ong ba ïa kane ka rai la shim ha ka jingïalang jong ka General Body ba kyrkieh, kaba la pynlong ha ka sngi Nyngkong.
Ha kaba ïadei bad kane na ka liang jong u President ka NEHUNSA u Dr WR Synrem ula ong, “Ka NEHUNSA kam kwah ban ïohi ba ka skulbah kan dei ka madan hikai ïa ki ophisar ba thungkam. Ha kawei ka liang, ngi khmih lynti ba ki ophisar ba bat ïa ka kyrdan kaba heh ki dei ban btin lynti ïa ki nongtrei katkum ki kyndon ba la mynjur da ka Sorkar India.”
Halor kane na ka liang jong u, u la kynnoh ba naduh ba wan shimti une u Vice Chancellor ba mynta, baroh ki kam hapoh ka University ki la thut lut ki kam ki jam na ka daw ka jingbym nang jong u ban trei bad jingbym tip sap. Kum ki nongtrei Non-Teaching Staff kiba don bynta beit bad ka kam pynïaid ïa ka skulbah, ki bynñiaw jur halor ka jingslem ban pynïaid ïa ki file, u soh uba mih ka dei ka jingslem ban pynïaid ïa ki kam ba man ka sngi ha ka skulbah ne University.
“Kumba ka long mynta la ïohi ba kumba u Vice Chancellor ula wan sha kane ka University ban shah hikai, kaba ym shym la khmih lynti kum u khliehduh ha ka ophis,” ong u Dr Synrem.
Haba pynpaw ba ka interview ïa kane ka Statutory Post (s) jong ka University la leh ha Guwahati, ha kaba u Vice Chancellor ula pynpaw ba ka dei namar ka jingdonkam kyrkieh ban thungbriew ha kine ki kyrdan, u President ka seng ula ong, “Hynrei kaba pynshaïong ïa ngi ka long, ka shuki Controller of Examination kaba la kynthup lang ha ka Interview, la shah ban wan trei haduh 6 bnai hadien ba tyrwa ïa ka jingthungkam sha u.”
U la ong, ‘Dangshen, ïa u Deputy Registrar u bym nang bha ban kren English, la shu thung watla ka ktien ba pyndonkam ha ka University ka dei ka ktien English. Kane ka la ktah bha ïa ka jingtreikam ba man la ka sngi jong ka ophis.”
Nalor kane, u Dr Synrem ula pyntip ïa ka jingsniew jong ki surok hapoh ka campus, ka bym ju jia satia naduh ba seng ïa ka University. Ïa kane ka kam ruh la dep ïakren bunsien bad u Vice Chancellor, hynrei ym shym la leh eiei haduh kine ki sngi.
Ula ong ba ki quarter ba la ai sha ki nongtrei ruh ki dei ki bym sumar da ka University bad ki nongsah ki hap ban pynlut na pla lajong lada donkam ban leh ïa ki kam maramot la ki dei kiba rit ne kiba heh wat hapdeng ka jingkhate ïa ka House Rent Allowance (HRA) manla u bnai.
Nangta ki street light, kiba long kongsan bha ha ka por mynmiet, kim shym la treikam satia, kaba buh ha ka jingbym shngaiñ ïa ki briew ba sah ha ka campus kynthup ruh ki samla pule.
Nalor kane, u Dr Synrem u pyntip da kaba ong, ‘Dang shen, katkum ka RTI ba la ïohpdiang, la kren shai ba ka jingthungkam Campassionate ha ki ophis ka Sorkar Pdeng ka dei ka khlem pynsangeh satia hynrei ka University kan dang ban pynmih jingpynbna ïa kane.”
“Ka Medical Advance, kaba donkam ban ai hapoh 10 sngi katkum ka rule ka Sorkar India @90% na ka jinglut ba la mang, la pynslem ban ai sha uwei na ki nongtrei uba don hapdeng ka jingshitom jur. Kane ka jingpynslem haduh palat shibnai ka la wanah ïa ka jingeh ïa une u nongtrei bad ïa ka ïing ka sem jong u. Kane ka pyni ïa ka jingbym tip ïa ki kyndon ba la buh na ka bynta kane ka kam,” ula ong.
