Leit kynduh ki shipai ïa ki lanot bad ki longïing ba shah ktah ha ka thma ha Jammu & Kashmir

Jammu, Jymmang 17 : Ki bor shipai ha ka sngi Saitjain ki la leit jngoh ïa ki nongshong shnong kiba sah ha kito ki shnong kiba don ha shi lynter jong u Line of Control (LOC) ha Jammu bad Kashmir ha Poonch kaba la shah ktah jur na ka jingther bom ka Pakistan hadien ka jingpyntreikam ïa ka Operation Sindoor, ong u nongai ktien jong ki shipai.
Ka kynhun jong ki shipai ki la leit ban jngoh ïa ki longïing ba shah ktah ha kane ka thma kynthup naduh Khari Karmara, Jhallas bad ruh ha ki shnong ba marjan bad pynpaw bad phah ka jingsngewlem bad ka jingkyrshan lang ïa kito kiba la shah ktah jur ha kane ka thma.
Nalorkata, ki la ïoh ruh ban ïa kren bad ki paidbah ban tip khambha shuh shuh shaphang ka jingsngewkhia jong ki bad kular ruh ban kyrshan lang ïa ka jingdonkam jong ki. Ha kane ka sngi la sam ruh ïa ki jingbam sha kito ki longïing kiba shah ktah.
Na ka liang ki shipai hi ki kular ba kin don lang ha syndah jong ki paidbah khamtam ha kum kitei ki por kiba eh bad kin pyrshang ruh ban wallam ïa ka suk ka sain ha ka thain.
U la ïathuh ba na ka liang ki paidbah ruh ki pynpaw ka jingsngewnguh ïa ka jingkloi jong ki shipai ban wan kyrshan bad ai mynsiem lang ïa ki ha kum kane ka por bad kane hi ki ong ba ka wanrah ka jingsngew shngain bad sngew shaniah ha ki bor pahara.
Ki shipai Pakistan ki la khyrwit tyngeh bha ïa ka Poonch distrik hadien ba ki bor shipai jong ka India ki la khyrwit da ki missile ïa ki ktem riehtngen jong ki lehnoh ha katei ka ri ba marjan ha ka 07tarik u Jymmang kum ban pynphai ïa ka jingshah hiar thma ha Pahalgam.
Kane ka thma ka la neh haduh ka 10tarik u Jymmang ha shwa ba kin poi noh sha ka rai ban sangeh ïasiat shwa, kaba la wanrah ïa ka jingiap ei jong ki 28 ngut ki briew kiba bun ki dei na ka Poonch district bad ka jingmynsaw ïa ki phew phew ngut.