Leit kynduh ki nongïalam NPP ïa u Myntri Rangbah, kular ban pynurlong ïa ki kam pynroi ha Ri-Bhoi

Nongpoh, Jylliew 5: Ka MDC jong ka Nongpoh Constituency, ka Kong Rona Khymdeit, ryngkat ki nongïalam ka NPP na Nongpoh Block bad Ri Bhoi District, ki la leit ban ïa kynduh ïa u Myntri Rangbah ka jylla, u Conrad K. Sangma, ban ïakren halor ki kam pynroi kiba dang donkam shibun ha ka thaiñ Ri Bhoi bad ha Nongpoh khamtam eh.
Ha katei ka jingleit kynduh ïa u Myntri Rangbah la sakhi ruh ïa ka jingdonlang u Babu Clement Mawlong President, NPP Ri-Bhoi, u Bah Thomas Malai Adviser bad u Bah Rayonald Kharkamni Working President, NPP Nongpoh Block
Ha kane ka jingïalang, kitei ki nongïalam kila pynsngew sha u Myntri Rangbah halor ki jingduna ki kam pynroi ha Nongpoh kumjuh ruh ha kiwei ki bynta jong ka Ri Bhoi District. Ka Kong Rona Khymdeit ka la ai ruh da ka dorkhas kaba bñiah halor ki bynta ba kyrkieh ba donkam ban pynbha ha kaba naka liang u Conrad K Sangma u la kular ban shimkhia ïa katei ka jingkyrpad naka bynta ka jingmyntoi jong ki paidbah ka thaiñ.
Kawei na ki bynta ba la ïakren ruh ka long halor ka jingthmu ban pynkhlaiñ shuh shuh ïa ka party NPP ha Ri Bhoi, hadien ba ka Kong Rona Khymdeit ka la jop kum ka MDC na Nongpoh. Kane ka long ka jingkyrkhu ba khraw na ka bynta ki paidbah, namar ka pyni ba ka party ka la long kaba la pynkhreh ban trei na ka bynta ka bha ka miat jong ki paidbah ryngkat ka jingkyrmen ba shen yn sa wanrah shibun ki jingkylla ha Nongpoh Constituency bad ha Ri Bhoi District hi baroh kawei.