Leit kynduh ki nongïalam ka NPP ïa u Conrad halor ka elekshon shiteng samoi ha Gambegre
Shillong, Jylliew 29: Dangshen ki Nongïalam ba la don slem bha bad ka NPP na Ri-lum Garo ki la wan kiew kyrkieh sha Shillong ban ïakynduh ïa u National President bad Myntri Rangbah Conrad K Sangma ha ka ban ai jingmut ïa u/ka kyrtong ban ïakhun ïa ka elekshon shiteng samoi na Gambegre.
Ka Elekshon shiteng samoi ha Gambegre kan long hadien ka jingiehnoh kam jong u Saleng A Sangma kum u MLA da ka jingjop ïa ka elekshon Lok Sabha na Tura constituency.
Katkum ki khubor kila don haduh 10 ngut ki briew kiba la pan ticket na ka NPP ban ïakhun ïa kane ka elekshon ba kynthup ïa ki MDC ka GHADC.
Ha ka jingïakynduh ïa u Myntri Rangbah Conrad K Sangma ha ïingsah hynnin ka janmiet sngi Balang ha Shillong, ki 10 ngut ki briew ba pan ticket ki la mynjur ban ïaid katkum ka rai jong ka party haba phai sha ka jingpynbna ïa u/ka kyrtong bad kular ruh ban ai ka jingkyrshan bad trei na ka bynta ka jingjop jong ka NPP ha kane ka elekshon shiteng samoi.
Kiba bun ki kyrtong ki MDC ka GHADC bad kiwei ki nongïalam kila mih ban long kum ki kyrtong hynrei na ki nongtrei ka party pat ki kwah ban don ïa ka dur thymmai bad u/ka kyrtong kiba khlaiñ lada ka NPP ka dei ban knieh noh ïa ka Gambegre na ka kti jong ka Congress.
Kiba bun ki nongtrei ka party ki la pynpaw ïa ka jingangnud ban ïohi ïa ka Dr Mehtab Chandee A Sangma, ka kurim jong u Myntri Rangbah ka Jylla Conrad K Sangma ban long ka kyrtong ha kane ka elekshon shiteng samoi.
Lada ka party ka ai ticket ïa ka, kan long ka sienjam kaba paka eh ïa ka NPP haba phaikhmat sha ka Trinamool kaba thmu ban ai ticket ïa ka MDC ka Dengnakpara Sadhiarani M Sangma, kurim u Zenith Sangma, ba kan ïakhun ïa kane ka elekshon.
Ka Sashiarani ka la wan ba-ar ha ka elekshon MLA ba long mynshem snem na Gambegre.
Nalor kata, ka MLA barim ka Williamnagar bad Working President ka Congress, Deborah Marak ruh ka dei kawei na kiba ïaknieh ïa ka ticket jong ka Congress.
Ki kyrtong kiba la paw na kiba pan ticket ka NPP ki kynthup ïa u MDC ka Nogorpara u Linekar K Sangma bad u MDC ka Babelapara Rakesh A Sangma.
Hynrei, u Rakesh u dei uba la shah rem kput bha ha ka elekshon MLA jong u snem ba la lah ha u Salang Sangma bad wan ba lai ha kane ka elekshon hadien jong ka MDC ka Dengnakpara ka Sadhiarani M Sangma.