Nongpoh, Naiwieng 06: Ki nongïalam ka HANM Ri-Bhoi Sepngi hapoh ka jingïalam u Bah Sumar Lyngdoh kum u President ryngkat ki dkhot mynta ka sngi kila leit ban ïakynduh syndon ïa u Bah J Lyndem EE ka tnad PWD Nongpoh Division ban dawa ba ka tnad PWD ka dei ban maramot mardor ïa kawei ka jingkieng haka shnong Umkynsier haka thaiñ Western Ri-Bhoi khnang ba kan nym buh jingma ïaki paidbah ba leit ba wan.
Haba kren sha ki lad pathai khubor naka liang u Bah Sumar Lyngdoh u la ong ba kum ka seng ka dap da ka jingsngewkhia halor ka jingsynjor katei ka jingkieng haka shnong Umkynsier kaba lah ban buh jingma ïaki paidbah ba leit ba wan bad lada jia eiei kaba sngewsih mano ban bah khlieh.
Kum ka seng kala pynpaw ruh ka jingsngewhun ha katei ka jingïakynduh hadien ba u EE ka tnad PWD u la kular ban shimkhia ïa kane ka kam bad ai khublei ruh ïa u MLA ka thaiñ u Bah Sosthenes Sohtun u ba la shimkhia ban ïakren halor katei ka mat naka bynta ka jingbit jingbiang jong ki paidbah kiba leit ba wan lyngba katei ka jingkieng.
