Mawkyrwat, ‘Nailar 21: Ka Mawkyrwat Socio Economic & People Development Forum (MSEPDF) South West Khasi Hills District ki la leit ïa kynduh ïa u Deputy Commissioner ka South West Khasi Hills District, Bah B. Mawlong na ka bynta ban pynsngew ha u halor ki san tylli ki mat ba donkam jong ka thaiñ.
Ïa ka kynhun ba la lam khmat da u President Bah Daros Ramsiej bad u Secretary Bah Bright Wanniang ki la aiti da ka shithi ha u DC bad ïakren sani halor ki mat ba kongsan ba ki la buh.
U Daros Ramsiej haba kren sha ki lad pathai khubor u la ong ba ka jingleit ban ïakynduh jong ki ka long ba dei ban pynbiang por na ka bynta baroh ki ophisar sorkar bad ki nongtrei ba ki dei ban don ha baroh ki sngi trei khnang ba kan ym don kano ka jingduh ïa ki paidbah kiba wan donkam ha ki ophis jong ki.
Kawei ka mat ka long na ka bynta ka don noh la ka jong ka jaka ban ïa jngi ne ka Swimming Pool khnang ba kan long ka jingmyntoi ïa ki samla ka thaiñ. Ym tang kata u la ïathuh ruh ba kawei pat ka jingkyrpad ka dei na ka bynta ban pynbiang ki bor pahara ha ki khappud jong ka Ri India bad ka Ri Bangladesh khnang ba kan don ka jingshong shngaiñ.
Ban don ka jingshngaiñ ha ka leit ka wan jong ki paidbah, u Daros Ramsiej u la ïathuh ba ha kane ka jingleit ban ïakren bad u DC na ka liang jong ki ki la kyrpad ïa ka Police Department ban pahara ne patrolling lem ïa ka Ïew Mawkyrwat khamtam ha ki por janmiet khnang ba kan long ka jingshngaiñ ïa ki nongshong ïew shonghat namar namar kumba ka long ha kine ki sngi ki kam tuh ka lute bad ki kam sniew ki la sdang ban kharoi khamtam ha ki por janmiet.
Halor kine ki jingleit pynsngew na ka liang jong u Deputy Commissioner ula kular ban shimkhia bad leh ïa kaba donkam, ong u bah Daros Ramsiej.
