Nongpoh, Jylliew 11: Ka Federation of Khasi Jaintia and Garo People, North Khasi Hills District lem bad ka Nongpoh Circle mynta ka sngi ki la leit ban ïakynduh syndon ïa u ADC ka Ri-Bhoi, ban ujor halor ka jingjia aksiden khah khah ha surok bah National Highway khamtam Shangbangla bad 19 mer kaba dei ka jaka ba ka NHAI ka siang da ka cement ha surok bah.
Haba kren sha ki lad pathai khubor na ka liang u Bah Ricky Majaw General Secretary ka FKJGP North Khasi Hills District ha ka jingdonlang u Bah Presious Khymdeit General Secretary ka Nongpoh Circle u la ong ba kum ka seng ka dap da ka jingsngewkhia namar ki jingjia aksiden ba khah khah ha kitei ki jaka ba ka surok ka long btuid khamtam ha ka por slap.
U la ong ruh ba ha kitei ki jaka ka NHAI ka pynieng ruh da ki jingker ha ki surok kaba pyni ha kitei ki jaka long lypa ka jingma nalor ka jingbtuid ka surok bad kumta ka FKJGP ka buh ruh ka jingkyrpad ïa ki bor district ban shimkhia ban ïakren bad ki bor ka NHAI khamtam ban leh eiei ha kum kitei ki jaka ba jur ka jingaksiden bad ka jingïap briew namar kum ka seng kam kwah ban mih ki jingshah kynnoh, na ka por sha ka por da ki briew ba nabar kiba wankai sha ka jylla.
