Shillong, Naitung 09 : U Director General of Police, u LR Bishnoi, IPS ryngkat ki heh pulit ka East Khasi Hills ki la leit ban kynduh ïa ki nongïalam shnong bapher bapher ha Jaïaw Shyiap Lumpyllon Community Hall na ka bynta ban ïa kren bad ïa syllok halor kiba bun ki phang kynthup naduh ka suk ka saiñ, u drok bad ruh halor kumno ban lait na ka dheng kali.
Ha katei ka jingïalang kaba la wan ban shim bynta da ki Chairman jong ka Dorbar Jaïaw Pyllun bad ruh ka Lympung ki Hynriew Shnong, Rangbah Shnong bad Rangbah Dong, President bad Secretary jong ka Seng Kynthei bad Seng Samla jong ki dong bapher bapher kiba hap ha ka jingpeit jong ka Durbar Pyllun Jaïaw bad ruh ha ka Lympung ki Hynriew Shnong nalor kiwei kiwei.
La don lang ruh ha kane ka sngi naduh ka IG CRPF, ka Sonal V. Mishra IPS , Commandant 67 CRPF, SP East Khasi Hills, SP City , SP Traffic bad kiwei kiwei ki heh pulit jong ka distrik.
Ha kane ka jingïalang ka la don ruh ka jingïasyllok bad ka jingïatai sani halor kitei ki phang nalor ka jingai jingmut kumno ban tehlakam pat ïa ki.
