Jowai, Naitung, 18: Ka Hynñiewtrep Youth Development Council (HYDC) sengkmie mynta ka sngi Thohdieng hapoh ka jingïalam u President Rangbah u bah Wyraiwan Sohtun lem bad ki dkhot jong ka ki la leit ban kynduh ïa u Executive Member ka tnat Trade jong ka Jaiñtia Hills Autonomous District Council (JHADC) u Bah Jesse Suiam, ban pynsngew halor ka jingeh ki khun samla kiba dei ki trai jylla namar ka jingkyrduh kam palat ha ki sngi ba mynta.Hadien bala dep ban ïakynduh ïa u EM u Bah Wyraiwan Sohtun haba kren sha ki lad pathai khubor ula ong ba ka District Council ka dei kawei na ki atiar ban ïarap ïa ki khun samla ka jaitbynriew da kaba pynsangeh shwa ïa ka rukom ai Trading Licence sha ki bar jylla khnang ba ki trai jylla ki ïoh kam ïoh jam.
Ka seng ka la ïakren bad u EM ban pyntreikam ïa ka Minimum Wages Act jong ka sorkar jylla, kumjuh ruh la dawa ban pynrung kam ha ki kharkhana dewbilat da ki briew trai jylla kiba dang lah hi ban trei ïa ka kam. Kumba long mynta ula ong ka shem shitom bha ïa ka Council ban leit khynra naphang ïa ki dukan jong ki bar jylla, namar ha ka por ba pynlong ka jingkynra kot ïa ki dukan la wan kam pynban da ki trai jylla ïa kitei ki dukan jong ki briew ba nabar, halor kane ula kyntu jur ïa ki trai jylla ba kin nym shah ïalam bakla ha ki bar jylla, khnang ban shngaiñ ka lawei jong ka jaitbynriew hadien.
Na ka liang ka seng ka la pyntip ba ka long kaba kloi ban ïatreilang bad ka JHADC ban pynurlong ïa ka jingthmu kata ban pynïohkam ïa ki khun samla bad ban kyntiew ïa ka khaïi ka pateng jong ka Ri-Lum Jaiñtia hi baroh kawei.
