Khliehriat Nailur 27:Ki nongïalam bad ki dkhot ka Jaiñtia Students Movement da ka jingbitar, mynta ka sngi ki la hiar biang sha Lumshnong bad khang tala biang ïa ka Toll Gate jong ka National Highway Authority of India kaba don ha Lumshnong namar ba ki nongtrei jong katei ka Tollgate ki la plie hi khlem pyntip sha ka seng, ha kaba ka seng hynnin ka sngi ka la leit ban khang tala hynrei tang hadien katto katne kynta ki nongtrei ki la plie ïa ki tala ba la khang ka seng.
Kum ban shu phai dien biang, namar ka jingleh mynthi ka National Highway Authority of India ka bym shym la shim khia ban maramot ïa ka surok national highway ha East Jaiñtia Hills District, ki nongïalam bad ki dkhot jong ka Jaiñtia Students Movement hynnin ka sngi ki la hiar bad khang tala shi syndon ïa ka jaka lum khajna, ka Toll Plaza jong ka NHAI kaba don ha Lumshnong.
Na ka liang u Working President jong ka JSM Central Body, u bah Jimmy Kharmuti, u la ong ba “Na ka liang ka JSM ka phah ïa u kyrwoh sha ka sorkar jylla bad sha u myntri ba dei peit bad ong ba “Ngi ngim kwah ba phin wanrah da ka Casino, ngi kwah ban ïoh ïa ka surok kaba bha, namar ka jinglong jingman ka ne ka surok NH-6 ka la sniew shaba palat, ka la dap sa tang da ki thliew kiba heh kaba buh jingma bad buh jing eh ïa ki paidbah nongleit nongwan, sngewbha u Conrad Sangma bad u Prestone Tyngsong ban pynkloi noh ïa kane ka kam ban ïakren bad ka NHAI namar ba kane ka surok kam i dei shuh kum kata ka surok national highway”
Kumjuh ruh, u President Jaintia Students Movement Eastern Region, u samla Wellson RD Siangshai u la ong ba kane ka jinghiar ka seng ban khangtala ïa kane ka Toll Plaza ka long halor ka nongrim namar ka jingsniew palat ka surok national highway ha East Jaiñtia Hills District, u la ïathuh ruh ba na ka liang u Project Manager jong ka NHAI, ha ka shithi ba u la phah sha u Deputy Commissioner ka East Jaiñtia Hills District u la buh ka por ba un maramot ïa kane ka surok hynrei ynda la kut ka por ba la buh ruh ka NHAI ka khlem lah ban pyndep ïa ka kam kumba la kular bad kane ka paw ba ka NHAI ka la shukor ïa ka district “Kumta ngi da ka mynsiem ba sngew khia ngi la wan ban khang tala ïa kane ka Toll Gate kaba lum khajna na ki kali, ngi kren shai mynta sha ka sorkar bad sha ka NHAI ba lada ym maramot ïa ka surok ngi da lei lei ngin nym ailad ïa ki bar jylla ba kin shu wan kamai spah na kane ka ri jong ngi bad na ka district jong ngi namar kam don jingmyntoi eiei ïa ki paidbah” ong u bah Siangshai.
Na ka liang ka seng, ki la dep bthah ruh ba ka Management ha Lumshnong Toll Plaza jong ka NHAI kam dei ban pynduna tulop ïa ki nongtrei kiba trei ha katei ka Toll Gate watla ïa kane ka jaka lum pisa la khang tala da ka seng, na ka liang u Manager katei ka Toll gate, u Hassan Malik u la kular ba un nym pynduna ne ot ïa ka tulop ki nongtrei.
U bah Wellson RD Siangshai, u la ïathuh ba ki nongtrei katei ka toll gate naduh hynnin ka sngi ha ka por mynmiet ki nongtrei ki la plie ïa ki tala ba khang ka seng, kumta ki nongïalam bad ki dkhot ka JSM da ka jingsngew bitar, mynta ka sngi ki la leit hiar biang sha Lumshnong bad khang tala biang ïa katei ka Tollgate bad ong ruh ba ka seng kan nym ailad ban plie ïa katei ka jaka lum khajna katba ka NHAI kam pat maramot bad shna bha ïa ka surok national highway ha East Jaiñtia Hills District.
