Leit khang khyrdep ka FKJGP ïa Post Office ha Upper Shillong bad GPO bym burom ïa ka Beh Dienkhlam

Shillong, Naitung 14 : Ki Nongïalam jong ka FKJGP Upper Shillong Circle hapoh ka jingïalam jong u Samla Hopewell Kharkongngor Asst.General Secretary ryngkat u samla Bantei Nongkhlaw, President FKJGP Bañiun Unit, samla Donkupar Nongdhar, President FKJGP Pomlum Unit ha ka sngi Nyngkong ki la leit khang kyrdep bad beh lut ïa baroh ki nongtrei jong ka Post Office kaba don ha 7th Mile, Upper Shillong namar ka jing bym kheiñ snep bad ka jing bym burom ïaka sngi Beh Dieñkhlam kaba dei ka jinglehniam jong ka Jaidbynriew.

Ha kane kajuh ka sngi,  ka FKJGP Shillong City hapoh ka jingïalam jong u Samla Arkinfield Khonglam President FKJGP Shillong City kala leit ban khang khyrdep ïa ka General Post Office (GPO) kaba don ha Nongbah Shillong.

Katkum ka kyrwoh sha ki lad pathai khubor, na ka liang ki nongïalam ka   FKJGP Upper Shillong Circle bad kumjuh ruh ki Nongïalam jong ka FKJGP Shillong City kila pynpaw ka jing bynñiaw halor katei ka bynta.

Ka seng ka phah ruh ïa ka kyrwoh sha ki bor jong ka sorkar jylla bad sorkar pdeng ba kidei ban pynmih da ka hukum ïa baroh ki shnat treikam ba kidei ban burom ïa kino kino  ki sngi kyrpang bad ki sngi khraw jong ka Jaitbynriew.

Ha kajuh ka por ka FKJGP kala maham lypa ruh ba kin sa leh da kaba tyngeh ïa ki bym burom ïa ka lyngkhuh sngi ïap jong u Khlawait jong ka Jaidbynriew u Tirot Sing ha kaba yn sa rakhe ha ka 17 tarik mynta u bnai.