Shillong, Jylliew 29: Ka Hynñiewtrep Youth Council HYC ha ka step phyrngap jong ka 29 tarik Jylliew 2024, ka la leit ban khang shi syndon ïa kawei ka dukan jong u bar jylla kaba don ha Polo, kaba thied ïa ki tiar tuh ba wan die ki nongdih drok.
Kane ka jinglap jong ka seng ïa kane ka dukan kadei hadien ba ki la leit ban khynra biang ïa ki briew ba dih drok ha ïew Polo bad ki ba rah ruh ïa ki tiar ba shu tuh, ba kynthup ïa u nar rot, ki tape bad kiwei kiwei pat ki tiar.
Kumta ka seng haba ka ïoh ban kylli bñiah bad tohkit ïa kitei ki samla ba dih drok ki la ïathuh, ba ki thmu ban leit die sha kawei ka dukan bar jylla kaba ju shim ïa ki tiar tuh. Ka seng khlem da pynslem mar mar ka la leit ban khang noh ïa katei ka dukan.
Ha ka jingïakren bad ki lad pathai khubor na ka liang u Assistant organizing central body u Bah Shanbor Marweiñ u la ong, ba ka jingleit khang ka seng ïa katei ka dukan kadei ruh halor ka jingïoh jingujor na ki nongshong shnong jong katei ka thaiñ bad ka la maham tyngeh ïa utei u bar jylla, ba ka jingshim jong u, ïa ki tiar tuh ba wan die ki nongdih drok ka pynshlur bad ai mynsiem shuh shuh ïa ki nongdih drok ba kin wan die bad lada jia ba u tei u bar jylla u dangthied bad plie ïa katei ka dukan ka seng kan sa shim da kiwei pat ki sienjam.
