Leit khang ka HITO-EJHD ïa ki ophis sorkar bad ki Bank kiba plie ha ka sngi u Thomas Jones

Khliehriat Jylliew 22: Ka Hynñiewtrep Integrated Territorial Organisation East Jaiñtia Hills District, mynta ka sngi ka la rakhe pyndonburom ïa ka sngi ba kyrpang jong u Thomas Jones, ha kane ka sngi kaba dei ruh ka sngi ba la pynbna shuti da ka sorkar jylla, ki dkhot ka seng ki la leit ban jurip bad khang tala ïa ki katto katne ki ophis sorkar bad ki bank kiba la plie ha kum kane ka sngi ba la pynbna shuti, ki bym burom shuh ïa kum kane ka sngi kaba kyrpang jong ka jaitbynriew.
“Ka seng ka pynkynmaw ïa ka jingwan ïuh kjat jong u Thomas jones u ba long u kpa jong ki dak ktien Khasi, kaba long kaei kaei ka ban sah kynmaw shyrta ha ka history jong ka jaitbynriew pateng la pateng namar dei lyngba ka jingnohsynniang jong u Thomas Jones ha ka thoh ka tar ban sa nangroi ka ktien Khasi kata naduh kitei ki snem ba u la wan nyngkong eh ha sohra ha ka 22 tarik u bnai jylliew 1841 haduh kumne kumba ngi long mynta” ong u kyrwoh.
“Hakane ka sngi jong ka jingkynmaw ieid ïa u Thomas Jone ka seng ka la pynkynmaw ruh halor ka jinhpynslem jong ka sorkar pdeng ban jingpynrung noh ïa ka ktien Khasi haka Khyrnit kaba 8 jong ka riti shynshar jong ka Ri India, ka por ka la dei mynta ban ithuh noh ïaka ktein Khasi kum kawei naki ktien ka ban ithuh katkum ka riti shynshar ka Ri, la kadei haka thoh ka tar ne ha ka pule dangle hapoh ka jylla” la bynrap.
Shuh, lyngba u kyrwoh, ka seng ka la pynkynmaw ruh ba dei tang la da ïa ka ktien Khasi yn pynrung noh ha ka khyrnit kaba 8 ngin sa long kita ki jaitbynriew kiba don la ka jong ka ktien kumba long kiwei pat ki jaitbynriew shatei Lammihngi jong ka Ri.
Na ka liang ka seng ka dawa ruh ba ka sorkar kam dei shuh ban sngap mynthi halor kane ka mat, ka la dei ka por mynta ba ka sorkar jylla ka dei ban pynbor shisyndon ïa ka sorkar pdeng ban pynurlong noh ban pynrung ïa ka ktien Khasi haka kyrnit kaba 8
“Lah ban kdew ba kiwei pat ki jait ktien kiba dei jong kiwei pat ki jaitbynriew kiba la rung haka khyrnit kaba 8 ki kham kiew shakhmat ha ka pule ka puthi, ha ka ioh kam ioh jam, hynrei ma ngi pat ki Khasi ngi dang ïai sah hajuh, kumta ai ba kane ka sngi kan long ka ka sngi ban kyrsiew thiah bad ban pynkyndit bynriew ïa ki nongmih khmat jong ngi ba kin shim ïa kane ka jingkitkhlieh naka bynta ka lawei bad ka pateng kaban wan jong ka ri bad ka jaitbynriew” pynkut u kyrwoh na ka seng.