SHILLONG, Jylliew 02: U Myntri Rangbah ka jylla u Conrad K Sangma ryngkat ki nongïalam jong ka Shillong Sports Association ha ka 02 tarik Jylliew 2025 (sngi Nyngkong) u la leit ban jurip ïa ka madan First Ground ha SSA Stadium kaba dang don hapdeng ka jingmaramot pynbha.
Haba kren sha ki lad pathai khubor na ka liang jong u Myntri Rangbah u la ong
ba ki don katto katne ki jingeh kiba la pynslem bad mynta ki dang pyrshang ban pynbeit ïa ka jingduna ban pynthikna ïa ka jingpyndep kloi ïa ka jingmaramot.
“Kumba phi tip ba ki League (jong ka SSA) kin sa sdang shen ha kaba palat 100 tylli ki klob ki ban ïashim bynta, bad kam long kaba bha ban pynkynriah ne pynkylla bun sien ïa ka prokram ïalehkai, te kumta ka don ka jingkyrkieh ban pyndep noh kham kloi ïa kane ka madan” u la ong.
U la ong ruh ba na ka liang jong ki, ki la ïoh ban ïakren bad ki contractor ban pynthikna ban kham pynkloi ban pyndep ïa kane ka jingpyntrei ha ka por kaba bit bad na ka liang jong ki ruh ki la pyntikna ba yn pyndep noh hapoh 9 ne 10 sngi.
Kumta u Myntri Rangbah u la ong ba hadien 9 ne 10 sngi ki jingïalehkai jong ki League kin sa lah ban sdang noh.
Ha kajuh ka por u Myntri Rangbah u la ong ba ka jingwan jurip jong u ïa katei ka madan ka long ruh kum shi bynta ban peit ïa ki jingduna bad ki jingdonkam ban pynbha ïa baroh kawei ka Stadium da kaba bynrap ba kane ka madan ka lah ban long kawei na ki jaka ka ban pdiang bad pynlong ïa ki jingïalehkai National Games, kaba ka Jylla kan sa pdiang ha u snem 2027.
Ha ka jingshisha ka Shillong Sport Association ka la thmu ban sdang noh ïa ka U-20 Fourth Division hynne ka sngi Nyngkong hynrei na ka daw ka jingduna ha ki katto katne ki bynta kaba ktah ïa ka madan khamtam ka rukom jer ïa ka um ban pyntuid sha nala (drainage) la hap ban maramot shuwa bad pynkynriah noh ïa ka tarik ban sdang ïa katei ka League.
