Shillong, Lber 23 : U Myntri ka tnad Sports and Youth Affairs ka sorkar jylla, Bah Banteidor Lyngdoh ha ka sngi Balang u la leit ban jurip ïa ka jingpyntrei ïa ka JN Stadium, Shillong. Lah ban kdew hangne ba ïa katei ka stadium yn tei ha ka jinglut kaba la mang sha ka 40 klur tyngka.
Nalor ka jingshna kaba paka ïa ka madan phutbol, kan don ruh ka jingshna pynbha ïa kiba bun ki jingdonkam ha katei ka stadium kynthup ïa ki jaka ïalehkai badminton, nangta ka jaka hikai siat bad jaka mareh kai.
U Myntri u la ïathuh ruh ba ka jingpyntrei kan ym dei tang ha JN Stadium hynrei sawdong ka madan Polo ha kaba yn tei ïa bun ki jaka ïalehkai. Na ka liang u Myntri u pynpaw ruh ïa ka jingmen halor ka jingïaid stet ka kam.
Na ka liang u Myntri u la ong ruh ba ia katei ka madan yn siang noh da u phlang ym shuh da u phlang plastic khnang ba kane ka madan ialehkai phutbol kan dup long katkum ka International Standard jong ka FIFA.
Lah ban kdew hangne ba la buh thong ba ka jingkyntiew kyrdan ïa ka JN Stadium kan dei ha shwa u Nohprah 2022.
Ha katei ka jingleit jurip la synran lang ia u Myntri da ki nongialam ka Meghalaya State Olympic Association, ki ophisar nalor kiwei kiwei.
