Nongpoh, Jymmang 23: U Bah Mayral Born Syiem MLA ka Nongpoh mynta ka sngi u la leit ban jurip ïaka Umden PHC ban tip halor ka rukom treikam bad ki jingduna ba katei ka PHC ka dang donkam naka bynta ban ai ka jingshakri kaba bha sha ki paidbah ha kaba ïadei bad ka koit ka khiah.
Haba kren sha ki lad pathai khubor naka liang u Bah Mayral Born Syiem u la ong ba kum u nongmihkhmat u la shimkhia ban rung sha katei ka PHC naka bynta ban ai mynsiem ïaki nongtrei ka tnad ka koit ka khiah bad ban lap ïaka jingeh bad ka jingduna haka lad treikam bad ban kyrpad sha ka sorkar ba kadei ban pynbiang ïaki jingdonkam haki jaka sumar.
U la ong ruh ba ka Umden PHC ka dei kawei naki jaka ai jingsumar kaba ai jinghun ïaki paidbah haka liang ka koit ka khiah bad khmih lynti ba katei ka jaka sumar kan dang lah shuh shuh ban ai ka jingshakri kaba bha tam sha ki paidbah.
Kum u nongmihkhmat u la kyntu ruh sha ki nongtrei katei ka jaka sumar ba kin dang trei khambha bad ïeid ïaka kam ban ai ka jingshakri kaba bha tam sha ki paidbah ha kaba ïadei bad ka koit ka khiah bad ha kaba ïadei bad kiwei kiwei ki jingdonkam kum u MLA un sa ai ka kaiphod sha ka sorkar halor ki jingdonkam ba dang dei ban pynbiang ha katei ka PHC, u la bynrap.
