Leit jurip u DMHO, JNC bad bor shnong namar ka jingsma ba mih na Civil Hospital Khliehriat
Khliehriat Rymphang 26: Ka Seng Jaiñtia National Council Khliehriat Circle ha ka 25 tarik Rymphang ka la aiti da ka jingujor ba pura sha u District Medical and Health Officer (DMHO), u Dr. D. Shylla ha kaba ïadei bad ka jinglong jingman jong ka Civil Hospital, Khliehriat kaba buh jingma ïa ka koit ka khiah jong ki paidbah ha ka imlang sahlang namar ki nala um kiba la julor, ki tank paiñkhana kiba la tuid da um bad wanrah ka jingsma iwtung bad jakhlia kaba la ktah jur ïa ki nongshong shnong kiba shong ba sah ha Khliehriat West ba marjan bad ka hospital.
Hadien kane ka jingujor, mynta ka sngi 26 tarik Rymphang na ka liang u DMHO nalor u bah Teibor Swer uba dei u Waheh Dong lem bad u Mebanteilang Sukhlaiñ uba dei u Secretary Dong ka shnong Khliehriat West, ki nongialam na ka dong Khlieh Wahshasem bad ki nongialam ka JNC kiba kynthup u Symboh Baiar Sumer, General Secretary ki la pynlong ka jingleit jurip bad kubur halor ka jingbym lah ki bor ba dei khmih jong ka hospital ban weng ïa kane ka jingeh kaba la slem bha.
Ka JNC lyngba u kyrwoh ka pynpaw ba kane ka jinglong jingman ha kane ka jaka sumar paidbah ka la pynlong ïa ki nongshong shnong ba kin mad jingeh ha ka por bam por dih bad ki khynnah kim lah ban ïalehkai shabar namar kane ka jingma kaba buh ruh ka jingma kaba khraw halor ki jait jingpang ba ioh na ka um bad ka lyer.
Ka Seng ka la ong ruh ba kane ka jingeh kam dei shuh kaba dang thymmai, namar ki nongshong shnong ka Khliehriat West kiba sah marjan ki la ujor la bunsien ha ki por ba la dep sha u Medical Superintendent u Dr. A. Lakiang hynrei sngewsih pat namar ba ym shym la don ba pynsngap, bad kam shym la don ka jingphah jurip ne ban maramot.
Ha kane ka jingleit jurip, u Dr. D. Shylla u la pynthikna ïa ka seng bad ki nongïalam shnong ba un sa bthah da lade ïa u Medical Superintendent bad In-Charge jong ka Civil Hospital, Khliehriat, ban shim khia ïa ki jingdonkam khlem da pynslem shuh.
Katba ka seng ka la pdiang sngewbha ia kane ka jingpynthikna bad ka jingiatreilang jong u DMHO, hynrei ka JNC ka la kren shai ba kan dang bteng ban buddien ïa kane ka kam tad haduh ban da pyndep ha ka por kaba biang da kaba maham ban leh da kaba tyngeh da kaba phah ïa ki dorkhas sha ka Tnad ka koit ka khiah ka sorkar jylla bad ka jingujor sha ka Meghalaya Human Rights Commission.