Shillong, Iaiong 21 : U Myntri ka tnad Arts and Culture u bah Sanbor Shullai ula leit jngoh bad jurip ïa u mot lai dong ha State Central Library Soso Tham Auditorium na ka bynta ban shna ïa ki maw mot dur jong ki khlawait ka jylla kiba kynthup ïa u Tirot Sing, u Kiang Nangbah bad Pa Togan Sangma.
La synrang lang ïa u myntri da u Commissioner Secretary bah Fedrick Kharkongor, Director kong Wanri Booth bad kiwei kiwei ki ophisar kum ka Kanchana Koch, kong D Kharjana.
U Bah Sanbor ula leh ïa kane ban thaw da ki maw mot ïa ki khlawait ka jylla kum ka dak ka jingkynmaw burom ïa ki kiba la aiti ban ïada ïa la ki jaidbynriew Khasi, Pnar bad Garo. U la ïathuh ba ka tnad ka la mang 30 lak tyngka na ka bynta kane ka kam bad la buh thong ba dei ban pyndep hapoh 90 sngi ïa ka kam. U la ong ba kane ka jingtei ka long ruh kum ka jingai mynsiem ïa ki khun samla ka ri bad ka jaidbynriew ba kin bud ïa ki dienjat jong kine ki riewkhraw, ki khlawait ban ïada bad pynneh pynsah ïa ki riti ki dustur jongki jaidbynriew riewlum rit paid jongka jylla.
