Shillong, Lber 23 : U Bah Sanbor Shullai MLA ka South Shillong Constituency mynta ka sngi u la leit jurip ïa ka Rilbong Brookside, ka jaka ba long Dorbar Assembly mynta shipor na ka bynta ban shna ïa ka Rabindranath Tagore Museum.
U la leit jurip ïa katei ka jaka ryngkat bad ki ophisar jongka tnad Arts and Culture. Shwa ïa kane u la plie ruh ïa ki ar tyllik i surok ba dang dep shna thymmai kata najan kane ka Hall Arts and Culture ba long Assembly shaduh ïing u S.Paul bad kawei pat naduh surok PWD shaduh ka Hostel ki kynthei jongka Sankar Dev College, Kench’s Trace. Ka jinglut na ka bynta ban shna ïa kine ki surok ka long 43 lak tyngka bad ka dei na ka skhim SUWP kaba la pynbit pynbiang hi da u MLA.
Kiba ïadon lang ha kane ka jingplie ïa kine ki surok bad leit jurip ïa ka Brookside ki long bah G Lyngdoh Rangbah Shnong bad ki dkhot ka Dorbar Shnong Kench’s Trace, Malabika Bisharad ka nongthoh shaphang ka Tagore Art Gallery, Rilbong, kong B.Kharjana Archives cum Asst Director Art and Culture, smt K.Koch Archeologist, bah K.Rynjah Archives bad kiwei kiwei.
Baroh ki nongkren ki la ai jingïaroh ïa u bah Sanbor uba long u MLA uba trei shitom ban wanrah ïa ka roi ka par hapoh ka Constituency hi baroh kawei.
