Nongstoiñ, Naitung, 6: Ki dkhot jong ka West Khasi Students Union central body mynta ka sngi, ka la pynlong ka jingleit jurip ïa ka jingtrei ïa ka school building ba thymmai jong ka skul Sib Singh Memorial Government Higher Secondary School Nongpyndeng. Ha kane ka jingleit jurip la ïadonlang u President Bah D.Sun, Education Secretary Bah L. Khardewsaw bad kiwei de ki dkhot.
Ka jingthmu jong ka jingjurip ka long ban pyntikna ba ka jingpyntrei ïa katei ka building kaba la sanction 4 klur tam kan long katkum ka sanction bad bud katkum ka plan, khnang ba ka jingtei kan long ka ba skhem bad ai ka jingshngaiñ ban pyndonkam ïa ka. Ka seng ka sngew ban kyntu ruh ïa u Contractor ba un trei katkum ka plan bad sanction.
U Bah L. Khardewsaw uwei na ki nongïalam ka seng, u la pynkynmaw ruh ba ka jingtei ïa ki building sorkar, hateng hateng la ju lap ba la shu trei tang dep bad ka pynlong ka jingsyier ban pyndonkam ïa ki khamtam ïa ki ïing ba hap pyndonkam da ki paitbah kum ka skul.
U la ong ba ka seng ka pynpaw ka jingsngewnguh ïa ka sorkar lyngba ka PWD Building ha ka ban kyntiew ïa katei ka shlem ai jinghikai ba la rim bha jong ka thaiñ West Khasi Hills, kaba la pynmih ïa shibun ki samla pule na katei ka skul ha ryngkat ka result ka ba bha man ka por. Kumta ka seng ka kyntu ruh ïa ka education department jong ka sorkar ban mang tyngka ruh ha ka ban maramot ïa ki skul building barim jong katei ka skul.
