Jowai, Nohprah 09: Ka Khooid Ya ka Wah Myntdu (KYM), kaba peit ïa ka jingkhuid jingsuba jong ka Myntdu kaba long kawei na ki wah kaba pynbiang ïa ka um bam um dih ïa ki nongshong shnong ka sor Jowai bad ki shnong ba marjan, mynta ka sngi nyngkong jong ka 09.12.2024, ki dkhot jong ka KYM hapoh ka jingïalam jong u President KYM ma K. L. Pariat, ki la leit ban jurip ïa ki top um jong ka nongbah Jowai, ha ka jingïadei ban kylli bniah ïa ka um kaba poi sha ki thliew ïing ki briew ban pynthikna ka dei ban long kaba khuid ba suba.
Ha kane ka jingleit jurip la don lang ruh u SDO ka PHE Electrical R. Challam, ki riew rangbah ka Jowai kynthup ïa u Bah G H Bareh, u Bah Snarbor Laloo, u Bah A. Lamare Waheh Shnong Khimmusniang, u Bah J M Pohsnagap, u Bah Phrangsngi Sutnga ki nongkitkam shnong bad kiwei.
Na ka liang ka KYM ka la ïoh ban jurip ïa ki top um dih kiba don ha PWD Jowai, Dongmisngi, Lumkyndong, Moolikso, Mynthong bad Khimmusniang.
U Waheh Shnong Khimmusniang Jowai, haba kren ula ong kumba long mynta ka um dih na ka Wah Myntdu lyngba ka tnat PHE ka long kaba khuid ba suba ha kum kane ka por tlang hynrei kaba ktah ïa ka Wah Myntdu bad kaba pynjaboh ïa ka, ka long ha ka por lyuir, kane ka long na ka daw ka dei na ka jingkiew jong ka jingbun briew ha Jowai bad ki shnong ba marjan ka Wah Myntdu katba nangmih ki sngi kumjuh ka jingjur jong ka jingtih maw tih shyiap bad ka jingshna ïa ki lynti syngkien lyngba ki rud jong ka Wah Myntdu ka la wanrah ïa ka jingjakhlia bad jaboh jong ka wah mynta khamtam ha ka por slap.
U Bah J.M Pohsngap ula ong ba kumba long mynta ka jingwan jong ka um dih ha nongbah Jowai lyngba ka PHE ka la long na ki ar tylli ki thyllong um (Sources) kata na ka Wah Myntdu bad na ka Wah Umngot, ula ong ba kumba long mynta ka wah Umngot ka kham khuid ban ïa ka Wah Myntdu, na ka liang jong u, u la kyntu ïa ka PHE lada long kaba lah, ba ha ka por ka jakhlia ka Wah Myndu khamtam ha ka por slap dei ban pyndonkam da ka wah Umngot kaba kham khuid. Na ka liang u Bah G.H. Bareh, ula kyntu ïa ki paidbah ban ïatreilang na ka bynta ban ïada ïa ka Wah Myntdu, da kaba kim dei ban bret ïa ki jakhlia, ki jaboh khamtam ki plastic sha ki bynta jong ka Wah Myntdu khnang ban ïoh ïa ka umbam umdih kaba khuid.
U Bah Snarbor Laloo, ula ong ba ka seng ka la leit jurip ruh ha ki bynta bapher bapher jong ka Wah Myntdu, haba la lap na ka jingjur ka tih khyndew ban shna surok narud jong ka wah ka la pynjaboh shisha ïa ka wah Myntdu, khamtam ha ka por slap, kumta ula ong ba na ka liang ka seng ka la wad ki lad ki lynti kumno ban pynneh pynsah ïa ki jingkhuid jong ka Wah Myntdu baroh shisnem.
Na ka liang ka seng ka la ai ruh ka jingïaroh ïa ka sahep bad ki nongtrei jong ka PHE Electrical Department Jowai, kiba la trei shisha katkum ka bor jong ki na ka bynta ban pynkhuid ïa ka um bam umdih jong ki paidbah ka nongbah Jowai.
