Shillong, Naitung 15 : Ka HYC Seng Kmie lyngba ka Sports Cell hapoh ka jingïalam u Sports Secretary Bah Franky Kharumnuid ha ka sngi Thohdieng ka la leit ban jurip ïa baroh ar tylli ki madan ïalehkai Football kata ka Madan 1st Ground jong ka SSA bad Madan JN Stadium. Hakane ka jingleit jurip ka seng ka la lap ba baroh ar tylli ki Madan ka dang sah khongreng.
“Kaba lyngngoh ka long ïa ka madan First Ground kaba la sdang trei naduh ba bat President u (L) Bah SK Sun tad haduh mynta lah katno snem shuh ym lah ban pyndep. Bad ïa ka Madan JN Stadium pat u Myntri ba dei peit ïa ki kam ïalehkai Sports u Bah Banteidor Lyngdoh u la phah ban maramot noh ïa ka madan da kaba kular ruh ban pyndep noh ha u Naiwieng mynta u snem,” ong u Bah Kharumnuid da kaba bynrap ba u Myntri u la shu antad klumar.
“Ka Seng ka pynrem jur ïa ka tnad ïalehkai hapoh ka jingïalam u myntri bad ha ka jingshisha ladei ban pyndep shwa ïa ka 1st ground khnang ban ïoh ban pynlehkai ïa ka Shillong Premier League kaba dei ka league kaba heh duh ha jylla bad kane ka sorkar ha ka juh ka por ka pyntreikam lang tad ba haduh ba ka Shillong Sports Association ka hap ban pynlong ha 3rd ground kaba long ka jinglehraiñ ïa ka jylla baroh kawei.
Ka HYC ka pynrem ruh ïa ka sorkar halor ka jingkhyllem ka Gallery siej ba shi por ha ka sngi Palei ha ka por ba ïalehkai ka Mawlai SC pyrshah ïa ka Ryntih SC da kaba ong ba kadei ka jingbym lah ban pynbiang ïa ka madan ba paka. Ka HYC ka la ai jingïaroh ïa ka SSA kaba lah ban pynlong ïa kane ka league ha la ka jingstad bad ki da pynbiang ki jaka shong khlem jingsiew iaki paidbah ieit football.
