Shillong, Naitung 07 : U Myntri Rangbah ka Jylla u Conrad K Sangma ha ka sngi Thohdieng, ula leit ïuhkjat ha ka shnong Byrwa, Ri-Bhoi District bad ïoh ïakren bad ki nongrep kiba rep ïa ki jingthung sma iwbih (aromatic plants) kat kum ka Flagship prokram ka Jylla bala tip kum ka Meghalaya Aroma Mission.
Haba sam paidbah ïa ka khubor halor kane ka jingleit ïuhkjat u Conrad ula thoh ha Twitter, “Ki Nongrep ha kane ka Shnong kila pynkylla ïa ki jingthung sma iwbih sha ki mar ba shongdor-ki umphniang bad ki jingsynreit iwbih”.
“Sngewtynnad ban tip ba ki Nongrep ki la sdang ban trei ïa ki kam ha ka ban kjit ïa ka umphniang na ki jingthung na ka bynta ban pynmih ïa ki jingtah sma iwbih” ula ong.
U CM ula ong ruh ba kum ka Sorkar, kan ïatreilang bad kine ki Kynhun ban lah pynmih kham bun kine ki mar ba shongdor na ki jingthung ba sma iwbih.
