Leit jngoh u John Barla ïa ka Robert Hospital, pynsngew u Bah Michael ïa ki jingduna

Shillong, Naiwieng, 26: U Myntri Khynnah ka Sorkar Pdeng uba peit ïa ki rit paid ka Ri India u John Barla ha ka jingwan iuhkjat ha ka sngi Saitjaiñ ha nongbah Shillong u la leit jngoh ïa ka Dr H. Gordon Robert Hospital kaba don ha Jaïaw, Shillong ha ryngkat ka jingsynran lang jong ki nongïalam ka BJP Meghalaya State Unit.
Ha kane ka jingleit iuhkjat ha Dr. H Gordon Robert Hospital la synran lang ïa u Myntri ka Sorkar Pdeng da ki dkhot ka BJP, u Bah Michael Kharsyntiew u kyrtong ïakhun elekshon MLA na North Shillong Constituency, u General Secretary ka BJP Meghalaya u Bah Clarence Nongbet, u State Vice President Bah David Kharsati bad kiwei kiwei.
Ïa u Barla la pdiang burom da u Medical Superintendent u Dr. Nongrum, u Rev. Pastor SS Majaw uba long u Chairman jong ka komiti kaba peit ïa ka Hospital bad u ophisar ba peit ïa ka jingpynïaid ïa ka Hospital u Bah K.W Marbaniang bad kiwei kiwei.
U Barla u la ai khublei kyrpang ïa ki nongtrei jong kane ka Hospital bad ai ruh ka jingïaroh ba ka la ai ka jingshakri sha ki paidbah mynta la shispah snem kynthih ha ka liang ka koit ka khiah ha kane ka thaiñ Shatei Lammihngi naduh ka por ba dang synshar ki Phareng tad haduh kine ki sngi.
U Bah Michael Kharsyntiew u la pynsngew ruh ha u John Barla ïa ka jingdonkam kiba bun jong kane ka Hospital bad mynta ka don ka jingpynkhreh ban shna shuh shuh ïa ka iing ban kham pynneh ïa ka jingsumar hapoh kane ka Hospital.
Kane ka iing kan kot ha ka jinglut kaba T.53 klur bad la kyntu ïa u Barla ban peit lem ïa kane ka jingdon kam na ka bynta ka jingmyntoi jong ki paidbah ha kane ka jylla.
Ha kane ka sngi, ki bor pynïaid jong ka Hospital, ki la ai ha u Myntri ka Sorkar Pdeng ïa ki jingdro bad ki jingbatai kaba ïadei bad ka jingshna ïa kane ka ing thymmai ban ai jingsumar.