Shillong, Jymmang 22 : U Lt Gen Vikas Lakhera, AVSM, SM, DG Assam Rifles, u la leit jngoh ïa ka Assam Rifles Battalion ha Mokokchung, Nagaland ha ka 20 tarik u Jymmang 2025 ban peit bniah ïa ka jingshngaiñ ha kane ka thaiñ.
Hadien kane, u General Officer u la leit sha ka shnong Sungratsu ban ïakynduh ïa u heh shipai ba la 105 snem ka rta u Havildar Mering Ao, SC (Retd), uwei na ki shipai ba pawnam bad ba la ïoh burom bha na ka kynhun shipai.
U Havildar Mering Ao, uba la kha ha ka 15 tarik u Naiwieng 1920 u dei u shipai ba pawnam jong ka 3rd Battalion Assam Rifles bad u nongïoh khusnam ba la heh tam ka rta ha ka histori jong ka kynhun shipai, u la dap 105 snem ka rta.
La ïathuh ba une u shipai u la shim bynta ruh ha ka Thma Bah Ba ar, bad u la ïashim bynta ha ki thma ba pawnam ha Kohima bad Burma. Ha u snem 1960, ha ka jingïaleh pyrshah ïa ki lehnoh ha Nagaland, u la pyni ïa ka jingshlur kaba kyrpang da kaba pynïap ïa uwei u lehnoh bad pynmynsaw ïa arngut kiwei pat.
Na ka bynta kane ka jingshlur jong u, la pynkup burom ïa u da ka khusnam Ashok Chakra Class III (hadien la pynkylla kyrteng noh sha ka Shaurya Chakra) da u President ha kata ka por u Dr. Rajendra Prasad ha ka 21 tarik u Ïaiong, 1960.
U General Officer u la ai khublei ïa une u riewshlur, da kaba ithuh ïa ka jingshakri ba radbah jong u bad ka jingaiti lut ïa ka ri ha ka jingim jong u. Ka jingïakren ka la long kaba pynkhih mynsiem bha kaba la pynpaw ïa ka jinglong jong ka Assam Rifles ban burom ïa ki riewshlur jong ka bad ban pynneh pynsah ïa ka pateng jong ki.
