Leit jngoh ki nongthoh khubor ka NE ïa ki projek sorkar pdeng ha jylla Karnataka

0

Shillong, Risaw 13: Ka kynhun jong ki nongthoh khubor kaba don 14 ngut na ki jylla jong ka thaiñ shatei lammihngi jong ka Meghalaya bad Tripura ka la sdang ïa ka jingleit jngoh ïa ka jylla Karnataka mynta ka sngi da ka jingthmu ban ïoh ïa ka jingsngewthuh shaphang ki jaka treikam ba kongsan jong ka Sorkar Pdeng, ki projek ba kongsan ba ïadei bad ki kam pynroi bad ka jinghiar pateng ka kolshor jong ka jylla.
Kane ka sienjam, kaba la pynlong da ka Press Information Bureau (PIB) Shillong ha ka jingïatreilang bad ka PIB Bengaluru, hapoh ka Tnad Information & Broadcasting, sorkar India, kadei kaba la saiñdur ban ïarap ïa ki nongthoh khubor na kane ka thaiñ ban ïatreilang bad ki jaka treikam ba kongsan jong ka ri bad ban pynpaw pyrthei ïa ki kam jong ki na ka bynta ki briew ha ka jylla la jong.
Kane ka kynhun ka kynthup ïa ki khatwei ngut ki Nongthoh Khubor na Meghalaya bad arngut na South Tripura, kiba mihkhmat lang ïa ki kotkhubor, ki lad pathai khubor electronic bad digital. Kine ki kynthup ïa ki kot khubor bad ki rynsan ba pawnam kum ka Meghalaya Times, East Mojo, U Peitngor, T7 News, SP News Agency, Meghalaya Monitor, Mawphor, Highland Post, Hindustan Times, PTI, Dainik Sambad bad Tripura Darpan.
Ïa kane ka jingleit jngoh la pynïaid da u Gopajit Das, Assistant Director ka PIB Shillong, uba synran ïa kane ka kynhun kum u Conducting Officer.
Ha kane ka jingleit jngoh, kane ka kynhun kan leit jngoh ïa ki jaka treikam ba kongsan ha ka kam saïan bad kiwei kiwei ki jaka treikam kiba kynthup ïa ka Indian Space Research Organisation (ISRO), Indian Institute of Science (IISc), Bharat Heavy Electricals Limited (BHEL), bad Bharat Electronics Limited (BEL). Kine ki jingleit jngoh ki thmu ban pyni ïa ka jingkiew jong ka India ha ka jingwad bniah ha ka kam haw haw, ka jingsaiñdur thymmai ha ka kam science bad ki public sector enterprise.
Nalor ki jingleit jngoh ïa ki jaka treikam, kane ka kynhun kan ïoh ruh ban ïohi ïa ka kolshor bad ka jinghiar pateng ha kylleng ka Bengaluru, Mangaluru bad Mysuru, da kaba pynleit jingmut kyrpang ha ki jaka kum ka Mysuru Palace, kaba ailad ïa ka kynhun ban sakhi ïa ki riti dustur ba riewspah jong ka Karnataka bad ka kam tei jingtei.
Ka jingleit jngoh ka kynthup ruh ïa ki jingleit jngoh ïa ka Karnataka Silk Industries Corporation Limited ha Mysuru, ka jingleit jngoh ïa ka district Chamrajnagar ban peit bniah ïa ki kam rep bad ki kam ba ïadei bad kane bad ka jingïakren bad ki jaidbynriew riewlum lyngba ka jingleit jngoh ïa ka Thanda (ka shnong jong ki riewlum).
Kum shi bynta jong kane ka jingleit jngoh, ka kynhun ki lad pathai khubor kan leit ïakynduh ruh ïa u Lat ba don burom jong ka jylla Karnataka.
Ka jingleit jngoh ki nongthoh khubor ka dei ka bynta ba kongsan jong ki jingpyrshang jong ka Press Information Bureau ban pynïasoh ïa ki thaiñ, ban kyntiew ïa ka jingïatylli kaba kham khraw ha ka ri bad ban pynthikna ïa ka jingpynbna khubor ba ryntih shaphang ka roi ka par na kylleng ka ri. Ki jingshem kiba la ïoh na kane ka jingleit kin ïarap ïa ki Nongthoh Khubor kiba ïashim bynta ban pynmih ïa ki khubor kiba jylliew bad kiba bniah na ka bynta ki briew.

Leave A Reply

Your email address will not be published.