Leit jngoh ka kynhun ki lad pathai khubor bad NEEPCO ïa ka Kopili Hydro Power Station

Jowai, Nohprah 12 : North Eastern Electric Power Corporation Limited (NEEPCO) ha kane ka 10 tarik u Nohprah ha ryngkat ki lad pathai khubor kila leit jngoh ïa ka jaka pynmih bording jong ka Kopili Hydro Power Station (275 MW), kaba don ha Umrongsu, Assam na ka bynta ka jingpynsngewthuh paidbah halor ka jingmyntoi bad ka jingtreikam jong kane ka Hydro bad Pumped Storage Project.
Ha ka jingïalang bad ki nongthoh khubor ka Jayanta Sarma, Executive Director bad u Sri Ashim Jyoti Bordoloi kiba dei ki heh jong ka Kopili HPS na ka NEEPCO kila ai ïaka Power Point Presentation bad ki jingbatai ba khambniah halor ki projek jong kane ka Power Station.
Ha kane ka sngi ki kynhun pathai khubor ki la leit ruh ban jurip ïa ka jaka pynmih bor ding kaba 2x23MW Khandong Power Station, ka KHPS NEEPCO Ltd kaba dei ka jaka pynmih bording kaba la rim tam ha kane ka thaiñ bad kaba la dep ban maramot dang shen.
U Executive Director ka NEEPCO u Jayanta Sharma u la pynsngew halor ka jingshah ktah ka mariang na ka jingkhang tih dewïong kaba la slem bha ha Meghalaya, khamtam eh na ka bynta ka jaka pyllang um jong ka Kopili Hydroelectric Project, kaba don ha khappud Assam–Meghalaya.
Shuh shuh ula pynsngew ïa ki mat ka kongsan jong kane ka projek pynmih bording kata naduh ka jingshna ïa ki surok, ki jingkieng, ka rukom pynpoi bording, nalor ki hospital, ki jaka pule, ki jaka hikai tynrai, ki bank, ki post office bad kiwei kiwei.
La pynsngewthuh ïaki kam pynroi bapher bapher, nalor ka pule phuthi jong ki khun samla trai jylla, ka jingïoh kam ïohjam, ka kam jngohkai pyrthei, ka jingpynpoi umbam umdih bad ka khaïi pateng.