Shillong, ïaïong, 08: Ka Ambassador ka Thailand sha India ka Pattarat Hongtong ha ryngkat ka jingsynranlang jong u First Secretary u Kritnarong Sereeswad bad ka Second Secretary na ka Royal Thai Embassy, New Delhi ka Thanchanok Uthaiwan ha ka sngi Palei ki la leit jngoh ïa ka skulbah North-Eastern Hill University, Shillong.
Ïa ka Ambassador bad kine ki arngut ki nongmihkhmat jong ka Ri Thailand la pdiang burom da u Vice Chancellor jong ka skulbah North-Eastern Hill University u Prof. Prabha Shankar Shukla.
“Kumba ngi tip, ka ri India bad ka Thailand ki don ïa ka jingïadei kaba jan ha ka kolshor bad bad ka jingngeit jong ka niam Buddhist bad Hindu. Da ki hajar ngut ki nong India bad ki Thai ki ju leit riewblei sha ki jaka kyntang kiba don hapoh ka ri India bad ha ka ri Thailand ban pynim ïa ki jingngeit bad ka jingïadei kaba jan hapdeng kine ki ar tylli ki ri,” u la ong.
“Ka jingwan jngoh jong phi ïa ka North-Eastern Hill University kan long kum ka jingïaid lynti ban ïasam ïa ka jingtip jingnang ha kane ka juk,” u la bynrap. “Ha ka jylli jong ka Science and Technology, ka India ka la noh synñiang shikatdei eh ha kiba bun ki liang kum ha ka Space, Bioinformatics, Data Sciences, Medicine bad ha ka Sports. Ka NEHU bad u Syiem jong ka Thailand ki la don ka jingïadei kaba jan khamtam ha ka ASEAN bad ka jingïadei bad ki skulbah,:” u la bynrap.
“Ha kane ka samoi treikam jong nga, ngin sa ïaid shakhmat ban ïatreilang khnang ban wnarah ïa ka bynta kaba dei khnang ban kyntiew ïa ka jingïadei bad hapdeng ka Thailand bad ka India,” ong u VC.
