Jowai, Ïaïong 21: Uwei na ki nongaidawai Kynbat Khasi ba paw ka na nongbah Jowai u Dr. H Carehome Pakynteiñ ula ïoh lad ban leit ïashim bynta lang ha ka jingialangbah jong ka ‘Global Ayush Investment & Innovation Summit 2022’ kaba la pynlong ha nongbah Gandhinagar jong ka jylla Gujarat kaba la sdang naduh ka 20 tarik bad pynkut lashai ka sngi 22 tarik mynta u bnai Ïaïong, 2022.
Ïa kane ka prokram la wan ban plie da u Myntri Rangbah duh ka Ri u Narendra Modi, ha ka jingdonlang u Prime Minister ka Mauritiusu u Pravind Kumar Jugnauth, Director General ka WHODr. Tedros Adhanom Ghebreyesus, u Chief Minister ka Gujarat u Bhupendrabhai Patel, ki Myntri, MLA jong ka Gujarat , ki nongai dawai Kynbat ka Ri bad kiwei de.
Haba ïakren bad u Dr. Pakyntein lyngba ka telephone ula ïathuh ba ka jingïohlad jong u ban leit ïashim bynta ha kum kane ka jingïalang bah ka long ka jingplie lad plie lynti ïa kiba bun ki nongaidawai kynbat kiba don hapoh ka ri India bad kiba nabar ruh.
Ula ïathuh ba na ka liang jong u Myntri Rangbahduh ka ri India u Narendra Modi ruh ula kyntu ïa kiba bun ba lang ba kin phai khmat sha kum kine ki jait dawai namar ba ki long kiba bha na ka bynta ka koit ka khia jong ki briew.
U Dr. Pakyntein u kyrmen ba ka jingangnud jong ka sorkar India ban kyntiew ïa kane ka rukom ai dawai kan long ka jingkyrkhu ym tang ïa ki nongai dawai kynbat hynrei khamtam eh ïa kiba pang ba shitom ha ki por ban sawan.
Na ka liang jong u ula pynpaw ruh ka jingsngewnguh ïa ka sorkar jylla kaba la ai bynta ïa u ban ïadon bynta ha katei ka jingïalangbah.
Ka jylla Meghalaya lyngba ka Planning Department kala ïoh ban phah 6 ngut kiba la leit ïashim bynta ha katei ka jingïalangbah, kiba kynthup ïa ki 3 ngut ki nongai dawai kynbat, uwei na West Khasi Hills, uwei Ri-Bhoi bad u ma Pakynteiñ na West Jaintia Hills, ki don ruh ar ngut ki Scientist na ka Bio Resources Development Centre (BRDC), Megha laya Shillong ba kynthup ïa ka kong Dr. Jennie P Lyng doh bad u bah T. Niangjuh kiba dei ki Senior Scientist ka BRDC ryngkat u Secre-tary ka Planning Department ka sorkar jylla.
