Leit ïarap ki samla NSS Don Bosco College Byndihati ïa ki pulit pynïaid kali ha Khliehriat

Khliehriat, Risaw 30: Ka NSS Unit jong ka Don Bosco College Byndihati East Jaiñtia Hills District kaba hapoh ka jingïalam jong u NSS Programme Officer, Don Bosco College Byndihati, u Prof. Seven Dar Dkhar, ka la shimbynta shit rhem ha ki kam ba bha kum ka jingnoh syniang lang ha ka imlang ka sahlang bad kane ka dei ruh kum shi bynta kaba long ka jingïa don kti lang bad ka ri India hi baroh kawei ka “Diwali with My Bharat”.

Ia kane ka jingnoh syniang,  ka NSS jong ka college ka la sdang ïa ki kam trei mon sngewbha kaba lai sngi lynter kata naduh hynnin ka sngi ka 28 tarik risaw bad  pynkut mynta ka sngi ka 30 tarik u risaw.

Mynta ka sngi ka 30 tarik ka NSS Unit jong ka Don Bosco College Byndihati, ha ryngkat ka jingiatreilang bad ka Khliehriat Traffic Cell lem bad ka Khliehriat Higher Secondary School, ka la shimbynta lang ban iarap ïa ki pulit pyniaid kali bad kane ka long ruh hapoh ka jingpeit jingkhmih u In-Charge jong ka Khliehriat Traffic Cell, u Sub Inspector D.Shabong.

Kum ban shu phai dien myn ha ka 28 tarik ki khynnah NSS jong ka Don Bosco College Byndihati, ki la pynkhuid ïa ki jaboh ki jakhlia ha ïew Khliehriat bad kane ka dei ruh ka jingnoh syniang lang ha kane ka jingrakhe “Diwali with My Bharat” ba la dep pyllait paidbah da u Myntri rangbah ka ri, u Narendra Modi naduh ka 31 tarik u bnai risaw 2023.

  U Prof. Seven Dar Dkhar u la ong ba ka thong jong ka NSS Don Bosco College, ka long ban ai mynsiem ïa ki paidbah bad ruh kum ka jingpynshlur ïa kiwei ban don ka jingkitkhlieh ha kaba kyntiew ïa ka khuid ka suba khamtam ha kaba kum kane ka por jong ka jingrakhe ïa ka jingleh niam Diwali ba donkam ruh ban ri khuid ïa ka mariang sawdong ha ka thaiñ “Ka long ka burom ïa ka East Jaiñtia Hills District ruh ha kane ka jingiashim bynta ka NSS Don Bosco College bad ka ri baroh kawei, ngi kyrmen ruh ba ngin lah ban kyntiew ïa ki riti ki dustur da kaba ai lem ïa ka por bad ka imlang ka sahlang” la bynrap u Prof . S.Dkhar.

Ha ka 29 tarik u risaw pat, ka kynhun NSS Don Bosco College, ka la leit pynkhuid ïa ka hospital bad ki sawdong sawkun jong ka Khliehriat Civil Hospital bad iarap kam ruh ïa ki nongpang kiba thiah pang ha katei ka hospital, kane pat ka long ruh hapoh ka jingpeit jong u Medical Officer, u Dr. S.T.S. Momin bad ka Matron, ka Bernitha A. Sangma bad ong ruh ba ka long kaba donkam ban kyntiew shuh shuh ïa ka khuid ka suba ha ki jaka ai jingsumar.

Na ka liang ka Bernitha.A.Sangma ka la ong ba kane ka kam pynkhuid ba la tyrwa da ki khynnah NSS ka long shisha kaei kaei kaba dei ban ai jingiaroh ïa ki kumjuh ruh  ïa ki nongtrei jong ka hospital kiba ju shim khia bha ha kaba kyntiew ïa ka khuid ka suba bad kane ka jingwan shim bynta ki khynnah NSS mynta ka pynsting kam ïa ki nongtrei bad ruh ka pynpaw ïa kata ka jingiatiplem bad ka jingdon ka mynsiem ka jingkitkhlieh jong ki samla ha kaba kyntiew shuh shuh ïa ka khuid ka suba”

Mynta ka sngi ki khynnah skul bad khynnah college ki la ïa lum lang ha madan Khliehriat Higher Secondary School bad shim ïa ki kyntien jingkular ban kyntiew ïa ka jingshngaiñ ha ka leit ka wan lane ka traffic safety rules bad long ruh ka nuksa ïa ka imlang sahlang hi baroh kawei, kane ka jingïatreilang ka long ruh kum ka jingpyni nuksa ne demonstatre ïa ki samla ba ñiah kali ba ki dei ban don ka jingkitkhlieh ha ka jingshngaiñ ka leit ka wan.

Na ka liang ka kynhun NSS Unit jong ka  Don Bosco College Byndihati, ka ai ka jingkhublei sngew nguh ïa baroh kito kiba la ïa don bynta lang ha kane ka prokram ba lai sngi lynter kaba long kum ka jingia don bynta lang bad ka “Diwali with My Bharat” kaba dei ruh ka ‘My Bharat Campaign’.