Leit ïakynduh ka FKJGP ïa u DC ba sahteng ban plie ïa ka DIC ha Sohparu

Nongstoiñ, Nailur 03: Ka jingpynsahteng jong ka sorkar ban plie ïa ka District Industrial Centre kaba la dep tei ha ka shnong Sohparu naduh u snem 2023, ka la pynlyngngoh ïa ki paitbah nongshong shnong bad ïa ki samla jong katei ka thaiñ.
Halor kane na ka liang ki nongïalam ka FKJGP Greater Nongkhunum circle, ryngkat ki nongïalam ka FKJGP West Khasi Hills District, ha ka sngi balang ki la leit ban ïakynduh ïa u bah Garod L.S.N Dykes IAS Deputy Commissioner ka West Khasi Hills, ban pan jingshai halor ka jingpynslem jong ka District Industrial Department ban pyntreikam ia katei ka jaka ai jinghikai ïa ki samla, kiba kwah ban seng kam seng jam da kaba ïeng ha la ki kjat ryngkat da kaba leit ban pyntbit ha katei ka jaka.
U bah Sanbor Rynshiang president ka FKJGP Greater Nongkhnum circle haba kren ha ki lad pathai khubor hadien ba ki la mih na kamara treikam jong u Deputy Commissioner, u la ong ba naduh ba la pyndep ban tei ïa katei ka jaka ai jinghikai, ki samla jong ka West Khasi Hills ki la khmih lynti bad angnud bha ban leit shah pyntbit ha katei ka centre. Hynrei, na ka daw jong ka jingpynslem ban plie bad ban thung ïa ki nongtrei kiban ai jinghikai ka la pynduh mynsiem ïa kiba bun ki samla kiba thrang ban leit shah pyntbit.
Utei u nongïalam ka seng u la ong ruh ba da ki hajar ngut ki samla kiba la nang la stad ki don hapoh ka district, hynrei na ka jingkyrduh kam ki kwah bad ki thrang ban ïeng ha la ki kjat, na ka bynta ban kyrshan ïa ki longïing longsem bad ka lawei jong ki.
Lada ka sorkar ka don shisha ïa ka jingkitkhlieh na ka bynta ki samla kiba la nang la stad, ka la dei ban pynkloi ban pyntreikam bad pynbiang nadong shadong ïa katei ka shlem ai jinghikai, khnang ba ki samla kiba dei na ki long ïing ba duk ki bym ïoh lad ban leit shah pyntbit sha kiwei ki jaka, kin ïoh lad ban leit ha katei ka jaka ai jinghikai.
Hadien ka jingïakren sani halor katei ka mat, na ka liang u Deputy Commissioner u la kular ba un sa shimkhia bad kyntu ïa ka District Industries Department, ba kan pynkloi noh ban plie bad pyntreikam ïa katei ka shlem ai jinghikai khang ba ki samla jong ka district kin ïoh ban leit shah pyntbit.