Leit ïakren u CM sha Delhi ban pynjynsur ïa ka aiñ ban ïoh tih dewïong ki jaka ba rit ym haduh 100 hectre

Shillong, Rymphang 23 : U Myntri Rangbah ka Jylla Conrad K Sangma ha ka sngi Nyngkong, ula ïathuh ba ka Sorkar Jylla ka la leit ïakren bad ka Sorkar Pdeng ban pynjynsur ïa ki aiñ ki kyndon ban ioh tih dewiong kiba don ki jaka ba rit ruh ym eh haduh 100-hectare kumba la buh mynta. Kumba ka long mynta ka jingiakren ka la ïaid shakhmat ban pynduna sha ka 10 hectare.
“Mynta, ngi la sdang ban ïakren bad ka sorkar pdeng, da kaba ong ba bun na ki nongtih par jong ngi, ki dei ki nongtih par barit baria.Hato ngi lah ban pynduna ïa ki kyndon bad pynhiar sha ka 10 hectare? Kumta, ka jingïakren halor kane kala ïaid mynta, ngin ïai ïakhun ban ïoh, ngi khlem shongthait” ong u Conrad haba ïakren bad ki nongthoh khubor.
Ula pynpaw ba ka jingsdang ïa ka license system bad ka jingtih dewiong da ka jingstad saian ka long kum ka “kam kaba khraw bha” bad bynrap “Mynta, ngi la leh ïa ki kam ban peit ba kumno ngin lah ban kham pynbha da kaba pynduna ïa ka jingbun hectare na ka 100, lehse 50 lane 40, lada long kaba lah, sha ka 5 haduh 10 hectre ruh”.
U Myntri Rangbah ula pynksan ïa ka rai jong ka Sorkar ban mynjur ïa ka jingdonkam jaka ba 100 hectare ban tih dewiong da ka jingstad saian, haba ong ba ka dei ka jingshim rai kaba eh bha, kaba la shim tang ban ïoh pynsdang ïa ka kam.
“Ha Meghalaya, ka rukom bat jaka ka long kaba pher, donkam ban shna ïa ki aiñ bad ki kanun kiba ïapher ngi lah ïaid ha ka lynti ka bym tip shaei yn poi bad ngim tip ruh ïa kaei ka ban mih” batai u Conrad.
U ong ba ka Sorkar Pdeng kala kren shai ba 100 hectare ka dei ka bym lah shuh ban ïakren pynbeit “Lada ka Meghalaya ka kwah ïa ki nongtih par kiba thmu shisha”.
“Kumta, nga hap ban shim ia ka rai bad kata ka rai, to ngin sdang. Nga lah ban nym ïoh ïa baroh 20 point ba nga pan ngin sa ïakren biang ïa kane kham hadien” ula ong haba bynrap ba la bthah ïa ki nongtih par ba kin ïatreilang ha ka ban lah pyndam ïa ka kyndon ba 100 hectare.