Leit buddien u Lamphang ïa ka jingtei ïa ka Assembly thymmai lap ba lajan dep artat

Shillong, Ïaiong 8: U Lamphang ka Ïing dorbar Thawaiñ ka Jylla Meghalaya, u Thomas A. Sangma, u la pynlong ïa ka jingjurip ïa ka ïing dorbar ba thymmai ha Mawdiangdiang mynta ka sngi Balang.
Ïa u Lamphang la synran lang da ka kynhun jong ki heh ophisar bad ki riew shemphang ne ki technical experts, u Lamphang u la bishar hi da lade ïa ka jingbha bad ka jingstet jong ka kam namar ba kane ka projek ka la jan poi sha ki bynta ba khatduh jong ka jingpyndep.
Ka kynhun jurip ka kynthup ïa u Malthus S. Sangma, Secretary, u Dr Andrew Simons, Advisor (Legislation), kumjuh ruh u Raja Kharpuri Deputy Secretary, ki ophisar ba rangbah, bad ki engineer na ka tnad PWD.
Ha ka jingleit jngoh ïa ka jaka, u Sangma u la pynpaw ïa ka jingsngewkmen kaba ïa ka jingiaid shaphrang kaba stet jong ka kam, da kaba kdew ba ka jingtei ka iaid beit ïaid ryntih katkum ki por ba la buh.
Ka kynhun jong u Lamphang ka la pynleit jingmut ha ki katto katne ki bynta kiba kongsan jong ka jaka, kynthup ïa ka jingtrei ban tei ïa ka hall bad kiwei de ki jingdonkam ba kongsan.
U Thomas A. Sangma u la pynskhem ïa ka jingkular jong u ban pynthikna ba ïa kane ka projek yn pyndep ha ka por kaba la buh, da kaba kyntu ïa ka jingdonkam jong ka jingïatreilang hapdeng ki tnad trei kam bapher bapher.