Leit buddien u Dy. CM ïa ka jingpyntrei ïa ki 4 tylli ki Smart City Project ba 397.42 klur

Shillong, Nohprah 15 : U Symbud Myntri Rangbah ba dei peit ïa ka tnad Urban Affairs u ma Sniawbhalang Dhar myn ha ka 13 tarik mynta u bnai Nohprah u la leit jurip bad bud dien ïa ki jingpyntrei ïa ki saw tylli ki projek napdeng ki 17 tylli ki project jongka Smart City. Kine ki saw tylli ki projek ki shongdor 397.42 klur tyngka bad la buh thong ban pyndep ïa ki hapoh kine ki arsnem ban wan.
Kine ki saw tylli kiba u Symbud Myntri Rangbah u leit jurip ki kynthup ïa ka Integrated Command and Control Centre (ICCC) and Smart Elements, Retrofitting nad Upgradation jong ki 3 tylli ki Multilevel Parking ha ki jaka bapher bapher hangne ha nongbah Shillong, ka jingtrei ïa ka Commercial Complex ha Polo bad ka jingtei ïa ka Laitumkhrah Municipal Market.
Ha kane ka jingleit jurip ha ka 13 tarik mynta u bnai, ïa u Symbud Myntri Rangbah la synran lang da ki ophisar sorkar bad kumjuh ruh da ki kontraktor ba pyntrei ïa kine ki projek.
Na ka liang u Ma Sniawbha u la ïathuh ba ka jingtrei ka la ïaïd shaid shaid bad na ka bynta ka ICCC Project la dep kumba 75 % bad la buh por ban pyndep lut nadong shadong ha ka 31 tarik Lber 2024. Ka jingmang ïa kane ka projek ka la kot sha ka 212.82 klur tyngka. Na kane 139..12 klur tyngka la dep siew sha ka kompani M/S Nice Infotech.
Ha kaba ïadei bad kine ki jaka pynïeng kali kiba 3 mala, ka jingtrei ka la dep 22 % bad la dep siew dang 6.27 klur sha ka Advantika Contractor Limited na ka 46 klur kaba la mang ïa kine ki projek. Kine ki jaka pynieng kali kiba lai mala kin ngiam haduh 252 tylli ki kali rit, 87 tylli ki bus, 65 tylli ki trok bad ïa kine ki projek la buh thong ban pyndep ha poh ka 31 tarik u Lber 2025.
Na ka bynta ka Polo Commercial Complex, u ma Sniawbha u la ïathuh ba ka jingtrei ka la ïaid bad la dep kumba 70 % ei ei. ïa ka pisa la dep siew kumba 52.63 klur tyngka na ka 100.22 klur tyngka ba la mang ïa ka projek sha ka Ms Badri Rai and Compani. Kane ka Complex kan don 94 tylli ki dukan bad ngiam 100 tylli ki kali. ïa kane ka complex la buh thong ban pyndep hapoh ka 30 tarik Jylliew 2024.
Halor ka jingpyntrei ïa ka Laitumkhrah Municipal Market u ma Sniawbha u la ïathuh ba la buh thong ban pyndep ïa kane ka projek hapoh ka 30 tarik u bnai Jylliew 2024.Kumba long mynta ïa ka jingtrei la lah ban pyndep kumba 65 % ei ei.
“ Ngi la dep pyllait 20.76 klur tyngka na ka 38.20 klur tyngka ba la mang ïa kane ka projek sha ki kontraktor ba tei ïa ka projek kata M/s Collinstar Sawkmie of M/s Shrolenson Marbaniang (JV). Kane ka ïew Laitumkhrah ruh kan don 183 tylli ki dukan bad kan ngiam ban pynïeng 100 tylli ki kali” ïathuh u Symbud Myntri Rangbah”.