Leit buddien biang ka JNC halor ka jingkhlad ka (L) Pynche Bareh ha MCH Hospital Jowai

Jowai, Nohprah 06: Ka Jaiñtia National Council (JNC) Western Zone mynta ka Sngi ka la leit ban buddien biang haka DMHO halor ka jingkhlad ka kong (L) Pynche Bareh, kum ban shu pynkynmaw haka 4 tarik June 2025 ka kong Pynche Bareh ryngkat bad i khunlung hapoh ka kpoh jong i ki lah khlad noh haka MCH Hospital Jowai naka daw ka jingleh sting jong ki nong trei kane ka hospital kiba dei duty ha kato ka por.
Ka seng haka 5 tarik June 2025 ka la leit ban ïa kynduh bad ka DMHO bad la ai ruh ryngkat bad ka jingthoh ban dawa ban leh daka jingtohkit halor ka jingleh sting kine ki nongtrei kane ka Hospital bad ban pynshitom tyngeh ïa ka jingleh kine ki nongtrei haduh ba la poi shaduh u pud ban duh noh ïa 2 ngut ki mynsiem ba kordor bad la dawa ruh ban pynïoh ïaka jingbishar kaba hok ïa i kong (L) Pynche Bareh da kaba shim jingkitkhlieh ïaki khun jong ka kiba ka la ieh khynswet shadien ha baroh ki liang.
Haka jingbuddien biang ka seng mynta ka sngi naka DMHO ka la ong ba ha u ne u bnai ba la dep hadien ba la dep wan kylli ka seng ïaka report, ka DMHO kala ong ba ka la thoh biang bad phah biang sha ka DHS ban pynkynmaw biang ïaki khnang ban pynkloi ïaka jingïarap ha kane ka longïing. Kala kular ruh ïaka seng ba hapoh kane ka 15 tarik u ne u bnai yn ai ïaka jubab da kaba shim khia ruh ban ïakren bad ki bor kiba halor.
Ka seng ka la dawa ruh ba ïaka inquiry kaba la dep leh daka sorkar ha kine ki bnai kiba lah dep, la dei ban pynbna paitbah noh ïaka report haki lad pathai khubor .
Ka seng ka la maham ruh ba lada kim lah ban shimkhia ïa kane ka kam kumba ka DMHO ka la kular ban ai ka ka rai hapoh ka 15 tarik u ne u bnai, ka seng kan sa shim da kawei ka lynti ban leh da kaba tyngeh pynkut ka kyrwoh na u President ka JNC Western Zone.