Leit bam sohphan u Myntri Rangbah ha ka ïew die sohphan ha Dakopgre

Tura, Naitung 20 : U Myntri Rangbah ka jylla u Conrad K Sangma mynta ka sngi Ba Ar u la leit ban bam sohphan ha ka ïew die sohphan kaba la pynlong ha SMELC, Dakopgre kata hadien ba ula dep plie ïa ka Jackfruit Mela 2022.
Ha kane ka sngi ula pynpaw ruh ba ka jylla ka lah ban pynmih haduh 1000 klur tyngka na ki karkhana sohphan bad kan long ka jingmyntoi kaba khraw ïa ki nongrep ban kyrshan ïa la ki ïing ki sem bad ban ai kam ai jam ïa ki samla.
ïa kane ka prokram la pynlong da ka ophis District Horticulture , West Garo Hills ha ka jingïatrei lang bad ka Directorate of Food Processing jongka sorkar jylla.
ïa ka Mission Sohphan la pyllait paidbah ha u 2018 ban kyntiew ïa ka jingrep sohphan bad kumjuh ruh ka jingpynïaid ïew ïa u sohphan ha ki san snem bad la pyntreikam ïa kane ka mission da ka Directorate of Food Processing.
Ka jingthmu jongkane ka mission ka long ban kyntiew ïa ka jingrep sohphan ka ban ai jingmyntoi bad pynim ja ïa ki nongrep da kaba ym tang ban rep hynrei ban sdang ruh ïaki karkhana rit ki ban pynmih bun jait ki jingbam na u sohphan. Ym tang ban pynïoh kamai ïaki briew hynrei ka long ruh kum ka jingai kam ai jam ïa ki. Nalor kata kane ka mission rep sohphan kan ïarap ruh ban ïada ïa ka mariang. Kane ka mission kan ïarap ruh ban pynïaid ïew ïa u sohphan ban pynmyntoi ïaki nongrep.
Haba kren ha ka jingïalang u Myntri Rangbah u la ong ka Meghalaya ka pynmih 400 klur tyngka u sohphan ha ka shisnem shisnem bad lada pyntreikam hok kan ïarap ban kyntiew ïa ka ïoh ka kot bad ka kamai kajih ha ka jylla.
U la ong ba ka jinglong ka suinbneng ha Garo Hills ka ïarap bha ban rep ïa u sohphan bad ki nongrep namar kata ki dei ban shim kabu ïa ki prokram bapher bapher bala pynlong da ka sorkar lyngba kane ka Mission Sohphan bad pynïar ïa ka khaïi pateng jongki da kaba wad ïa kine ki jingïarap na ka sorkar.
U la ïathuh ha kine ki sawsnem ba la leit noh ka sorkar ka la pyrshang ban ïarap lyngba kane ka mission bad la lah da shisha ban pynmih ïa ki jingbam bapher bapher na u sohphan.
U la ong ka jylla ka lah ban pynmih ïa u sohphan wat haduh 1000 klur tyngka lyngba kine ki karkhana bad kane kan ai jingmyntoi sha ki 50,000 tylli ki longïing longsem jong ki nongrep.
Hadien ba la dep ai jingkren u la leit jngoh ruh ïaki dukan die sohphan jong ki kynhun bapher bapher.
Nalor kane ha kane ka juh ka sngi u la sam ruh ïa ki cheque kiba 92.60 lak tyngka sha ki 161 ki kynhun jong ki nongrep ha Rangsakona,South Garo Hills. Kane ka long lyngba ka skhim Farmers Collectivisation for Upscaling of Production and Marketing System (FOCUS) kaba dei ka prokram ba kyrpang ba la pyntrei da ka sorkar sha ki nongrep. U la ong ba kane ka long kawei na ki skhim kaba heh bha ba la ai sha ki nongrep hadien ba kila mad ïa ka jingeh na ka khlam COVID-19. Ka thong ka long ban ïarap ïa ki 4.5 lak ngut ki nongrep ha ka jylla bad kat haduh mynta la dep ban ïarap 2.5 lak ngut ki nongrep.