Shillong, Jymmang 11 : U Myntri ka tnad Arts and Culture bad Veterinary uba dei ruh u MLA jongka South Shillong Constituency u bah Sanbor Shullai u la leit ban ai mynsiem ïa ki nongtrei ïing ha ka jingïalang jongki kaba la long ha RLSSCO Community Hall Lumshatsngi kaba la pynlong da ka National Domestic Workers Movement (NDWM) Meghalaya Unit kum ka dak ban rakhe ïa ka Labour Day ne ka Sngi ki Nongbylla.
Ka jingpynlong ïa kane ka jingïalang ka long ban wanrah ïa ka mynsiem jingïalong kawei jong ki nongtrei bylla ïing briew. Kiba la ïadon lang ha kane ka sngi ki long kong Evangeline Shangpliang Programme Coordinator, kong Wanpynhun Kharsyntiew Advocacy and Lobbying Coordinator, Sister Delina Francis, Mrs Laxmi Thapa Animator bad Neety Gurung Team Leader Greater Laban Domestic Union.
Ha kane ka jingïalang u bah Sanbor uba dei ruh u myntri ba dei peit ïa ka tnad Labour u la kular ïa ki dkhot ka NDWM, Meghalaya Unit ba ka tnad jongu kan peit ba baroh ki nongtrei ïing shah kynthup ha ka e-shram. Ka e-shram portal ka dei kaba la shna ban pynrung kyrteng ïa baroh ki nongtrei ïing ba kin ïoh ki jingïarap na ka sorkar kum ka pisa, ka social security scheme, ka jingïoh kam, Bhima Yojana Insurance bad kiwei kiwei.
Haba ai jingïaroh ïa ka sorkar pdeng kaba la shim khia ban ithuh ïa ki nongtrei bylla ïing ba kin ïoh ïa ki hok ba ki dei ban ïoh, u bah Sanbor ula kular ruh ban rah hakhmat jongka sorkar ba ki nongtrei bylla ïing ki dei ban ïoh ruh ki jingïarap na ki skhim ka sorkar jylla. La pynkut ïaka jingïalang da ka jingkren ai khublei ka Neety Gurung.
