Nongpoh, Nailar 02: Ka Khasi Students Union, Nongpoh Circle lyngba ki nongïalam mynta ka sngi ki la leit ban ai mynsiem ïa ka longïing jong uwei u Rangbah uba la shah rong ha ka umbah ha ka wah Iewsier, ba ym pat lap mynta la bun sngi naduh ka janmiet jong ka Sngi u Blei ba la dep ba u la shah rong ha ka um ha katei ka wah Iewsier kaba don ha Ri Bhoi District.
Une u rangbah ba la jah ha ka jingshah rong ha ka umbah u dei u Bah E.B Nongshli na ka shnong Umtasor Mawdakhar, kaba u la shah rah ha ka um hadien ba la hap na Jingkieng sha ka wah naduh ka lah sngi u Blei.
Ha ka jingïalam u Samla Baïashanlang Kharshanlor kum u General Secretary lem bad ki dkhot, ki la rah ïa ki mar bam ba donkam ban leit ai sha ka longïing jong u rangbah uba la shah rong ha ka um, kiba dang bteng mynta ban ïa wad ïa ka met u rangbah ha katei ka wah ba la shim bynta naduh kiba haïing bad ki nongshong shnong ka shnong Umtasor.
Kane ka jingleit sam ka KSU da ki mar bam sha ka longïing ryngkat ki paidbah nongshong shnong, ka long kum shi bynta ban ai mynsiem bad ban pyntngen ha ka jingïawad ïa ka met u rangbah ba la jah mynta la shi taiew kata naduh ka janmiet jong ka sgni u Blei ba la dep.
Ha kane ka sngi, na ka liang u Samla Baïashanlang Kharshalor, u la ai jingïaroh ruh naduh ki nongïalam shnoing bad ki paidbah nongshong shnong kiba la bteng ïa ka jingwad ïa utei u rangbah, ha kaba la bun sngi mynta ki la bteng ka jingïawad kaba long shi bynta ban ai mynsiem bad pyngtngen ruh ïa ka longïing jong utei u rangbah.
Ha kawei ka bynta, u la ong ruh ba ka seng ka ai ka jingkitbok kitrwiang ïa kiba haïing bad ïa ka shnong ba kin lap noh ïa ka met jong utei u rangbah khnang ba kan weng noh ïa kane ka jingeh ba la ïa kynduh da ka ïing ka sem bad ka bor shnong hi baroh kawei.
