Nongpoh, Risaw 18: Kum shi bynta ban kyrshan ïa ki khun samla kiba trei shitom ban seng kam lajong, ka MDC ka Nongpoh, Kong Rona Khymdeit, ka la leit ban ai mynsiem ïaki nongshong dukan haka iew Autumn Shopping Carnival ba la pynlong ha Nongpoh Town Shopping Complex.
Kane ka Shopping Complex ka dei ka jaka ba la seng da ka sorkar kum ka lad ai kam ai jam ïa ki samla, hynrei bun ki stall ki la shu sah khongreng bad khang khyrdep khlem plie man la ka sngi. Ban pynshlur biang ïa ki nongshong dukan ba kin ïaid shaphrang bad plie man ka sngi ïaki dukan, la pynlong ïa kane ka tamasa synrai kum ka lad kamai bad khamtam ka lad iohkam iohkam ki khun samla.
Ha ka jingkren jong ka Kong Rona, ka la ai khublei ïa ka Committee bad ka ophis u Deputy Commissioner ka Ri-Bhoi kiba la trei lang ban pynlong ïa kane ka iew. Ka ong ba kane ka Nongpoh Autumn Shopping Carnival ka long kaba kongsan na ka bynta ki nongdie dukan ba kin kyntiew ïaki tiar ki tar ba ki die khamtam ki mar ba ki lah ban pynmih hi.
Kum ka nongmihkhmat paidbah, ka la kyrpad ïa ki nongshong shnong hapoh ka District ba kin wan ban iashim bynta bad ai jingkyrshan sha ki samla kiba pyrshang ban ieng ha la ki jong ki kjat lyngba ka kam seng kam. Ka la kular ruh ban iai trei lang na ka bynta ban kyntiew ïa kane ka iew khnang ba kan nang ïai bteng shakhmat.
Ha kane ka sngi, ka Kong Rona ka la leit jurip ïa ki stall bapher bapher kum ka dak ban ai mynsiem bad ka kyrpad ïa ki paidbah ba kin wan ban kyrshan bad khamtam ban pynlong ïa katei ka iew kaba phuh ba phieng bad kaba shongshit.
