Shillong, Kyllalyngkot 19 : Mynta ka Sngi Lah U BLei u Myntri Rangbah ka jylla u Conrad K Sangma u la leit ban ai mynsiem bad sngewlem bad ka ïing ka sem jong u Pastor Rev. Dr Rieweh Robert Cunville ha la ïing la sem jongu kaba ha Upper Lachumiere.
Haba kynthoh lyngba ka social media u Myntri Rangbah u la ong “U Rev Dr Cunville u dei u shakri jong U Blei uba la aiti lut bad pyndem hakhmat U Blei bad im ka jingim kaba dap da u Mynsiem Bakhuid. U la aiti da ki phew snem haka jingim jongu ban pynphriang ïa ka Gospel ym tang ha kane ka thaiñ shatei lam mihngi hynrei sha kylleng ka pyrthei”.
U la batai ruh ïa ka jingïadei jong u Dr Cunville bad ka Billy Graham Evangelistic Association (BGEA). U long u Pastor uba shaniah ha U Blei, uba sngewrit bad uba ieit ïa baroh ki jaidbynriew khlem da niew shilliang khmat ïano ïano ruh. Kane ka jingim bad jinglong jongu kan dang ïai im bad ïai sah bad ka ban ktah ruh ïa kiba bun. U Myntri Rangbah u phah ka khubor sngewlem sha ka ïing ka sem u Pastor Cunville bad sha baroh ki ba ieit ba thoiñ jong u.
